Осиё футбол конфедерацияси (ОФК) тартиб интизом қўмитаси Чемпионлар Лигаси 1/8 финал ўйинлари якунига кўра бир қатор қарорлар қабул қилди.
Хусусан, «Пахтакор» ҳимоячиси Егор Кримец «Истиқлол»га қарши ўйинда (2:1) ҳакамнинг қарорига нисбатан ишлатган ҳаракати учун 5 минг доллар миқдорида жаримага тортилди. Унинг 1250 доллари кейинги уч ой ичида тўлаб берилиши белгиланди. Қолган 3750 доллар эса шартли равишда икки йил муддатга қолдирилди. Агар Кримец ушбу ҳаракатни такрорлайдиган бўлса, у ҳолда мазкур миқдор янги жаримага қўшиб тўланади.
Эслатиб ўтамиз, ҳакам «Пахтакор» дарвозаси ишғол этилган вазиятда жарима зарбасини белгилашда хатога йўл қўйган. Кримец эса бармоқлари билан ишора қилиб, ҳакамни пора олганлигига шама қилганди.
Шунингдек, «Истиқлол»нинг «Пахтакор»га қарши ўйиндаги ҳакам қарорига нисбатан қилган шикояти қабул қилинмаган.
Яна бир қарорга кўра, «Персеполис» ўйинчиси Сиамак Неъматининг «Ас-Садд»га қарши ўйиндаги қизил карточкаси бекор қилинди. Шу тариқа, у Неъмати «Пахтакор»га қарши ўйинда иштирок этиши мумкин бўлади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)