Armaniston hukumati safarbarlik zaxirasida bo‘lgan 18 yoshdan 55 yoshgacha bo‘lgan barcha erkaklarning mamlakatdan xorijga chiqishini chekladi. Bu haqda “TASS” Armaniston hukumati matbuot xizmatiga asoslanib xabar qildi.
Ushbu qaror 27-sentabr kuni e’lon qilingan harbiy holat va umumiy safarbarlik munosabati bilan qabul qilindi.
“Hukumat qaroriga ko‘ra, oddiy askarlar, 48 yoshgacha bo‘lgan kichik va katta serjantlar, 50 yoshgacha bo‘lgan kichik ofitserlar va 55 yoshgacha bo‘lgan ofitserlarga mamlakatdan chiqish taqiqlandi”, – deb xabar berdi Armaniston hukumati.
Armaniston Fuqaro aviatsiyasi qo‘mitasining ma’lum qilishicha, safarbarlik zaxirasidagi erkaklar endi faqat hududiy harbiy komissarliklarning yozma ruxsati bilan mamlakatni tark etishlari mumkin.
Eslatib o‘tamiz, 27-sentabr kuni tongda Tog‘li Qorabog‘da Armaniston va Ozarbayjon o‘rtasida harbiy ziddiyat keskinlashdi. Ikki mamlakatda ham harbiy holat e’lon qilindi. Rasmiy Yerevan o‘z navbatida Turkiyani Suriyadagi jangarilarni Tog‘li Qorabog‘ga yo‘naltirishda ayblamoqda. Qayd etilishicha, chegaraga 4 mingdan ortiq jangari yig‘ilgan.
Mojaro fonida Ozarbayjon hukumati mamlakatda ijtimoiy tarmoq va messenjerlarni blokladi. Bunga Armaniston provakatsiyasi sabab qilib keltirildi.
Izoh (0)