Литвага ташриф буюрган Франция президенти Эммануэль Макрон Беларусь мухолифати раҳбари Светлана Тихановская билан учрашди. Meduza’нинг хабар беришича, бу ҳақда «Пул Первой» Telegram каналида маълум қилинди.
Светлана Тихановская Франция президентидан Александр Лукашенко билан мулоқотда воситачи бўлишни сўраганди. Тихановская матбуот хизматининг хабар беришича, Макрон билан суҳбатнинг асосий мавзуси Беларусда янги президент сайловларини ташкил этиш имконияти бўлади.
«Европа давлатлари Беларусда содир бўлаётган воқеаларга бефарқ қолмасликлари жуда муҳимдир. Франция энг қадимги демократик давлатлардан бири сифатида бизни жуда яхши тушунади. Шу сабабли мен жаноб Макронга асосий мақсадимиз — бу йил бўлиб ўтиши керак бўлган янги эркин ва демократик сайловларни эслатмоқчиман», — дея Тихановская сўзларидан иқтибос келтирмоқда «Пул Первой».
Елисей саройи матбуот хизмати учрашув тафсилотлари ҳақида ҳозирча маълумот бермаган.
Аввалроқ Эммануэль Макрон Александр Лукашенкони Беларуснинг қонуний президенти деб ҳисобламаслигини маълум қилган ва унга истеъфога чиқишни таклиф қилганди. Бунга жавобан Лукашенко «ҳадеб ён-атрофга қарайвермасдан, Франция ички ишлари билан шуғулланишни» маслаҳат берган.
Эслатиб ўтамиз, 23 сентябрь куни Александр Лукашенко яширинча инаугурация маросимини ўтказган ва расман Беларусь президенти лавозимида иш бошлаган. Бу эса мамлакатда норозиликларнинг янги тўлқини юзага келтирди. Шундан сўнг Литва, Латвия, Эстония, Словакия, Украина, Германия, Канада, Польша, АҚШ, Швеция, Норвегия, Буюк Британия ва Европа Иттифоқи Лукашенкони Беларуснинг қонуний президенти сифатида тан олишдан бош тортди.
Беларусь мухолифати етакчиси Светлана Тихановская Александр Лукашенконинг Беларусь президентлиги лавозимига яширин инаугурациясига бағишланган видеомурожаат йўллаб, унда ўзини беларус халқининг ягона етакчиси деб атади.
Изоҳ (0)