Samsung yaqinda o‘zining Galaxy S20 FE (Galaxy S20 Fan Edition) rusumli hamyonbop flagmanini namoyish etgandi.
“Terabayt.uz”ning yozishicha, ushbu “yengillashtirilgan” flagman ko‘plab uyali aloqa operatorlari tomonidan ham sotiladi. Shulardan biri – T-Mobile kompaniyasi mijozlarni Galaxy S20 FE’ga yanada qiziqtirish uchun antiqa ishga qo‘l urdi. Operator tarixdagi eng g‘alati anboksing videosini chiqardi – unda Samsung smartfonining qadog‘ini ochib, sinab ko‘rish ishlarining barchasi suv ostida bajarilgan.
Mazkur lavhadan ma’lum bo‘lyaptiki, Galaxy S20 FE nafaqat samaradorlik bo‘yicha yaxshi, balki uning suvdan himoyasi ham mustahkam ekan. To‘g‘ri, maxsus effektlardan ham foydalanishgan – masalan, o‘yin uchun Samsung MOGA PowerA XP5-X kontrollerini qo‘llashda. Gap shundaki, bu gadjet suv ostida ishlay olmaydi, shu boisdan o‘yin jarayonini “quruq sharoitlarda” yozib olib, keyin suv tubida shunchaki uning videosini qo‘yib ko‘rsatishgan.
Rolikda boshlovchi vazifasini T-Mobile kompaniyasining kreativ kontent bo‘yicha direktori Desmond Smit bajargan. U suv tagida qurilmaning qadog‘ini ochib, smartfonni yoqib, ayrim o‘yinlarni o‘ynab ko‘rsatgan. O‘z harakatlarini izohlab gapirgan bo‘lsa-da, gaplarini anglash qiyin, shuning uchun videorolikni subtitrlar bilan taqdim etishgan.
Izoh (0)