Vilnyus shahri aholisiga yodning tabletka ko‘rinishidagi dorilari tarqatiladi. Bu haqda Litva poytaxti ma’muriyatiga tayanib, LRT radiosi xabar tarqatdi.
Yodlangan kaliy Grodensk viloyati Ostrovets shahridagi Belarus atom elektrostansiyasidan 100 kilometrlik radiusda yashovchi aholining qalqonsimon bez kasalliklaridan sifatli himoyalash maqsadida bepul tarqatiladi.
Ayni vaqtda shahar ma’muriyati Sog‘liqni saqlash vazirligining favqulodda vaziyatlar markazidan dorilar zaxirasini olib kelishga va Vilnyusdagi beshta eng yirik dorixona tarmoqlariga joylashtirishga tayyorlanmoqda. Poytaxt aholisiga dastlabki bosqichda 2,1 millionta tabletka tarqatiladi.
Sog‘liqni saqlash vazirligi tomonidan 16 ta munitsipalitetlarga jami 4 millionta tabletka ajratilgan. Ular fuqarolarni BelAESda avariyaviy holat kuzatilganda radioaktiv yoddan himoya qilishi ko‘zda tutilgan.
Elektrostansiya Rossiya hamda Belarus o‘rtasida tuzilgan kelishuvga muvofiq “Rosatom” tuzilmasida 2011-yildan buyon qurilmoqda. AES ikkita energoblokdan iborat, birinchisi 2020-yilda foydalanishga topshirilsa, ikkinchi blok 2021-yilda faollashtiriladi.
Avgust oyida Litva hukumati Vilnyusdan 50 kilometr masofada AESni ishga tushirish yuzasidan choralarning amalga oshirilgani uchun norozilik notasini yuborgan. Litva Belarus stansiyasi mamlakat xavfsizligiga tahdid ekanini bildirgan va AESning Yevroittifoq tavsiyalari asosida stress-testlardan o‘tkazilishini talab qilmoqda.
May oyida BelAESga reaktor uchun yadro yonilg‘isi yetkazib berilgan va Belarus prezidenti Aleksandr Lukashenko birinchi energoblokni ishga tushirish noyabrda amalga oshirilishini bildirgandi.
Izoh (0)