Prezident Shavkat Mirziyoyev “Tabiiy gaz nazorati va hisobining avtomatlashtirilgan tizimini joriy etish” loyihasini amalga oshirishga doir qo‘shimcha chora-tadbirlar to‘g‘risida qarorni imzoladi, deb xabar beradi O‘zA.
Loyihani amalga oshirish doirasida “Hududgazta’minot” AJ tomonidan mahalliy ishlab chiqaruvchilar orasida belgilangan tartibda o‘tkazilgan tender natijalariga muvofiq “Texnopark” MChJ bilan elektron gaz hisoblagichlari va zarur bo‘lgan uskunalarni yetkazib berish to‘g‘risida shartnoma tuzilganligi ma’lumot uchun qabul qilinishi belgilangan.
Loyihani amalga oshirishda quyidagi asosiy yo‘nalishlar jadallashtiriladi:
- tabiiy gaz nazorati va hisobining avtomatlashtirilgan tizimini “ishlab chiqarish – gaz taqsimlash stansiyasi – tuman (shahar) chegarasi – yirik uchastkalar kirish qismi – iste’molchi” prinsipi asosida butun tarmoq bo‘yicha joriy qilish;
- hisoblagichlarni birinchi navbatda aholining tabiiy gaz iste’moli va qarzdorlik darajasi yuqori bo‘lgan hududlarga o‘rnatish, shuningdek, yirik iste’molchilar va tadbirkorlik subyektlarini ularning hisobidan tizimga ulash;
- aholi yashash punktlarida barcha iste’molchilarning (maishiy, sanoat va budjet) hisoblagichlarini hamda yirik uchastkalar kirish qismidagi hisoblagichlarni bir vaqtning o‘zida o‘rnatish va Tizimga ulash hamda tarmoqdagi yo‘qotishlarni bartaraf etish bo‘yicha ishlarni tashkillashtirish;
- hisoblagichlarni o‘rnatish va Tizim imkoniyatlaridan samarali foydalanish bo‘yicha amaliy mashg‘ulotlarni tashkil etish orqali joylardagi barcha xodimlarning ko‘nikma va malakasini oshirish.
Tiklanish va taraqqiyot jamg‘armasidan ajratiladigan kredit mablag‘lari evaziga 2021-yil 1-fevralga qadar O‘rta Chirchiq, Chinoz, Yuqori Chirchiq, Yangiyo‘l va Karmana tumanlari hamda Toshkent, Andijon, Buxoro, Guliston, Jizzax, Namangan, Nukus, Samarqand, Termiz, Urganch, Qarshi, Kattaqo‘rg‘on, Qo‘qon, Marg‘ilon shaharlarida va boshqa qarzdorlik darajasi baland bo‘lgan hududlarga mazkur tizim o‘rnatiladi.
Ikki oy muddatda yirik iste’molchilar, avtomobillarga gaz quyish shoxobchalari va qurilish materiallari ishlab chiqaruvchilarini, 2020-yil yakuniga qadar qolgan tadbirkorlik subyektlarini ularning o‘z mablag‘lari hisobidan hamda 2021-yil 1-mayga qadar ijtimoiy soha obyektlarini Davlat budjeti mablag‘lari hisobidan tizimga ulanishini ta’minlash belgilangan.
Loyihani moliyalashtirish va 2021-yil 1-avgustga qadar amalga oshirish uchun Tiklanish va taraqqiyot jamg‘armasining 1 yillik imtiyozli davrni o‘z ichiga olgan holda 4 yil muddatda qaytarish sharti bilan, 6 oylik LIBOR plyus 3 foiz yillik stavkada, imtiyozli davrda asosiy qarz bo‘yicha hisoblangan foizlar kapitalizatsiya qilinishi hisobga olinib, 150 million AQSh dollari miqdoridagi krediti jalb qilinadi.
Bundan tashqari, “O‘zsanoatqurilishbank” ATBning 27,5 million AQSh dollari ekvivalenti miqdoridagi krediti, elektron gaz hisoblagichlarini yig‘ish uchun zarur bo‘lgan ehtiyot qismlarini Italiyadan xarid qilishga yo‘naltiriladigan Italiyaning SACE davlat eksport-kredit agentligining sug‘urta qoplamasi ostida xorijiy tijorat banklari krediti, loyihaning mahalliy xarajatlarini qoplash uchun birinchi o‘rinda respublika jamg‘armalari va mahalliy tijorat banklarining mablag‘lari va zaruratga ko‘ra xorijiy moliyaviy tashkilotlar qarz mablag‘lari yo‘naltiriladi.
“Hududgazta’minot” AJ 2021-yil 1-iyunga qadar Tizim bilan muvofiqlikda ishlovchi zamonaviy billing tizimi yaratishi, “O‘zeltexsanoat” uyushmasi bilan birgalikda tuman va shaharlar kesimida elektron gaz hisoblagichlari o‘z vaqtida yetkazib berilishini, shuningdek, har bir hududda hisoblagich va boshqa uskunalarni ta’mirlash va ularga servis xizmatini ko‘rsatish shoxobchalari tashkil qilinishini ta’minlashi lozim.
Avvalroq Andijonda “Texnopark” kompaniyasining aqlli gaz hisoblagichi portlagani to‘g‘risida xabar berilgandi. “Hududgazta’minot” kompaniyasi ushbu holatga izoh berib, tarmoqda bosim oshib ketgani sababli hisobga olish uskunasi buzilgan bo‘lishi mumkinligi haqidagi taxminni rad etgandi.
Izoh (0)