Qonunchilik palatasi deputatlari bir ovozdan Shuhrat G‘aniyev nomzodini bosh vazir o‘rinbosari lavozimiga ma’qulladi
O‘zbekiston Oliy Majlisi Qonunchilik palatasi deputatlari Farg‘ona viloyatining sobiq hokimi Shuhrat G‘aniyev nomzodini bosh vazirning agrar va oziq-ovqat sohalarini rivojlantirish masalalari bo‘yicha o‘rinbosari lavozimiga ma’qulladi. Bu haqda Oliy Majlis Qonunchilik palatasi matbuot xizmati "Daryo"ga xabar berdi.
“2020-yil 25-sentabr kuni Oliy Majlis Qonunchilik palatasining navbatdagi majlisi bo‘lib o‘tdi. Unda deputatlar bosh vazirning agrar va oziq-ovqat sohalarini rivojlantirish masalalari bo‘yicha o‘rinbosari lavozimiga Shuhrat G‘aniyev nomzodini ko‘rib chiqdi. Xalq vakillari tomonidan Shuhrat G‘aniyev nomzodi ma’qullandi”, — deyiladi Qonunchilik palatasi matbuot xizmati xabarida.
“Daryo”ga ma’lum qilinishicha, majlisda Qonunchilik palatasining 150 nafar deputatidan 122 nafari qatnashgan. Qonunchilik palatasining majlislar zalidan 50 dan ortiq deputat ishtirok etgan. Deputatlarning qolganlari esa xizmat safarida bo'lgan va viloyatlardagi studiyalar orqali qatnashgan. Majlisda qatnashgan 122 nafar deputatning bari Shuhrat G‘aniyev nomzodini ma'qullagan. Ovoz berish jarayonida qarshi bo‘lgan yoki betaraf qolgan deputatlar bo‘lmagan.
Avvalroq Shuhrat G‘aniyev O‘zbekiston bosh vazirining agrar va oziq-ovqat sohalarini rivojlantirish masalalari bo‘yicha o‘rinbosari lavozimida ish boshlashi haqida xabar berilgandi. Shu sababli u Farg‘ona viloyati hokimi lavozimidan ozod etilgan.
Shuhrat G‘aniyevning o‘rniga shu paytga qadar Namangan viloyati hokimi sifatida ishlab kelgan Xayrullo Bozorov Farg‘ona viloyati hokimi vazifasini bajaruvchi etib tayinlandi.
Namangan viloyati hokimi lavozimiga esa O‘zbekiston Ekologiya va atrof-muhitni muhofaza qilish davlat qo‘mitasi raisi lavozimida ishlab kelgan Shavkatjon Abdurazzoqov tayinlandi.
Eslatib o‘tamiz, Shuhrat G‘aniyev 2020-yilning 20-sentabr kuni koronavirus asoratlari oqibatida vafot etgan O‘zbekiston bosh vazirining agrar va oziq-ovqat sohalarini rivojlantirish masalalari bo‘yicha sobiq o‘rinbosari O‘ktam Barnoyev o‘rnini egalladi.
