11-sentabr kuni O‘zbekiston Oliy Majlis Senatining yettinchi yalpi majlisi boshlandi. Uni Senat raisi Tanzila Norboyeva olib bormoqda. Yalpi majlisni Senatning ijtimoiy tarmoqlardagi sahifalari hamda UzReport telekanali orqali onlayn kuzatib borish mumkin.
Videokonferensaloqa tarzida o‘tkazilayotgan yalpi majlisda bir qator masalalar ko‘rib chiqilmoqda. Xususan:
- “Nogironligi bo‘lgan shaxslarning huquqlari to‘g‘risida”gi;
- “Xalqaro tijorat arbitraji to‘g‘risida”gi;
- “Narkologik kasalliklar profilaktikasi va ularni davolash to‘g‘risida”gi;
- “Xalq deputatlari Kengashlari faoliyati takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirishlar kiritish to‘g‘risida”gi;
- “Qishloq xo‘jaligi uchun mo‘ljallangan yerlardan va o‘rmon fondi yerlaridan foydalanish samaradorligini oshirish maqsadida O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi;
- “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonunlar shular jumlasidandir.
Bundan tashqari, ilmiy faoliyatni rivojlantirish uchun ko‘rilayotgan choralar holati haqida hamda O‘zbekistonda xotin-qizlar tadbirkorligini rivojlantirish uchun yaratilgan shart-sharoitlar to‘g‘risida Vazirlar Mahkamasiga parlament so‘rovlari yuborish masalalari muhokama qilinadi.
Eslatib o‘tamiz, Oliy Majlis Senatining avgust oyida o‘tkazilgan yalpi majlisida Senati raisi Tanzila Norboyeva mamlakatdagi oliy ta’lim tizimini tanqid qilgan edi. Senat rahbari O‘zbekistondagi bironta ham universitet dunyoning eng yaxshi 1000 ta universiteti ro‘yxatiga kirmasligini ta’kidlagandi.
Izoh (0)