Moliya vazirligi O‘zbekistonning 2020-yil birinchi yarim yilligi bo‘yicha davlat qarzi holati va dinamikasi sharhini e’lon qildi.
2020-yil 1-iyul holatiga O‘zbekiston Respublikasi nomidan va uning kafolati ostida jalb qilingan qarz qoldig‘i dastlabki hisob-kitoblarga ko‘ra 19,4 milliard AQSh dollari ekvivalentini yoki yalpi ichki mahsulotga (YaIM) nisbatan 34,0 foizni tashkil etgan.
Dastlabki hisob-kitoblarga ko‘ra, 2020-yilning I yarim yilligida davlat tashqi qarzi 1,6 milliard dollarga yoki yil boshiga nisbatan 10,5 foizga oshib, 2020-yilning 1-iyul holatiga 17,31 milliard dollar yoki YaIMga nisbatan 30,3 foizga yetdi.
Shundan:
- Hukumat nomidan jalb qilingan tashqi qarz – 11,6 milliard dollar;
- Hukumat kafolatlagan tashqi qarz – 5,7 milliard dollar.
- Hukumat nomidan jalb qilingan ichki qarz – 4,3 trillion so‘m (0,4 milliard dollar);
- Hukumat kafolatlagan ichki qarz – 17,3 trillion so‘m (1,7 milliard dollar).
Sharhda qayd etilishicha, davlat qarzining so‘ngi yillardagi o‘sishi dinamikasiga qaramay, xalqaro me’yorlarga ko‘ra, O‘zbekistonning davlat qarzi (YaIMga nisbatan - 34,0 foiz), shu jumladan, davlat tashqi qarzi (YaIMga nisbatan - 30,3 foiz) mo‘tadil darajada saqlanib qolmoqda.
O‘zbekistonning davlat tashqi qarzi portfeli valyuta tarkibining 69,4 foizi - dollar, 11,9 foizi - yapon iyenasi, 10,7 foizi – SDR (maxsus qarz olish huquqlari), 4,5 foizi – yevro, 3,5 foizi - boshqa valyutalardagi tashqi qarz hissasiga to‘g‘ri keladi.
Davlat tashqi qarzining kreditorlar kesimida taqsimlanishi quyidagicha:
- Osiyo taraqqiyot banki – 3,9 milliard dollar;
- Jahon banki – 3 milliard dollar;
- Xitoy eksimbanki – 2 milliard dollar;
- Yaponiya xalqaro hamkorlik agentligi – 1,7 milliard dollar;
- Xitoy davlat taraqqiyot banki - 1,3 mlrd dollar;
- Xalqaro investorlar – 1 milliard dollar;
- Islom taraqqiyot banki – 0,8 milliard dollar;
- Yaponiya xalqaro hamkorlik banki – 0,4 milliard dollar;
- Boshqa xalqaro moliyaviy tashkilotlar – 3,2 milliard dollar.
Izoh (0)