Bosh prokuratura Jurnalistika va ommaviy kommunikatsiyalar universiteti talabasi Mahfuza Po‘latovaning “Navoiy ziyosi” gazetasida chop etilgan “Efir uchun qilinayotgan ehsonlar” sarlavhali maqolasi uchun mahalla raisi tomonidan bosimga uchragani yuzasidan o‘rganish o‘tkazayotgani to‘g‘risida xabar berilgandi. Bosh prokuratura matbuot kotibi Hayot Shamsutdinov 8-sentabr kuni ushbu holat Karmana tumani prokuraturasi tomonidan o‘rganilganini ma’lum qildi.
Aniqlanishicha, Karmana tumani “Bog‘ishamol” mahallasi va homiylar tomonidan mazkur mahallada yashovchi S.Ilmurodovaga 2020-yilning may—avgust oylarida oziq-ovqat mahsulotlari va moddiy yordam puli berilgan.1999-yilda Nurota tumanida tug‘ilgan Jurnalistika yo‘nalishi 2-bosqich talabasi Mahfuza Po‘latova qo‘shnisi S.Ilmurodovadan unga haqiqatan ham oziq-ovqat mahsulotlari va moddiy yordam puli berilgani, mahalla xodimlari tomonidan suratga tushirilganligi haqida ma’lumot olgan va shu asosda 6-avgust kuni “Navoiy ziyosi” gazetasida “Efir uchun qilinayotgan ehsonlar” nomli maqolasi chop etilgan.
“Bog‘ishamol” mahallasi raisi Maqsud Pardayev, o‘rinbosari H.Abdualimov bilan talaba Mahfuza Po‘latova maqolada ko‘rsatgan holatlarga aniqlik kiritish uchun 3-sentabr kuni S.Ilmurodovaning yashash xonadoniga borib, u bilan suhbatlashayotganida Po‘latova va otasi Pardayev hamda ushbu mahallada yashovchi fuqaro O.Mamatova ham suhbatga qo‘shilgan.
Fuqaro S.Ilmurodova ko‘rsatilgan moddiy yordam uchun hech qanday e’tirozi yo‘qligini ma’lum qilgan. M.Pardayev Mahfuza Po‘latovaga maqoladagi holatlarni to‘liq o‘rganmasdan chop etganligini, bunday holatlarga mahallada yashovchi boshqa xolis fuqarolar ishtirokida aniqlik kiritilishi lozimligini ma’lum qilgan.
O‘rganish davomida tumanning mahalla va oilani qo‘llab-quvvatlash bo‘limi tomonidan xizmat tekshiruvi o‘tkazilib, Mahfuza Po‘latovaning gazetaga maqola chop etganligi uchun “Bog‘ishamol” mahallasi raisi Maqsud Pardayev unga bosim o‘tkazganligi holati o‘z tasdig‘ini topmagan.
Bundan tashqari, 4-sentabr kuni Mahfuza Po‘latovaning otasi R.Pardayev va yon qo‘shnisi I.Yodgorov, uning o‘g‘li A.Yodgorov o‘rtasida maqola yuzasidan kelib chiqqan janjalda ular bir-birlarini urib tan jarohati yetkazgan. Holat yuzasidan tuman IIB tomonidan tergovga qadar tekshirish o‘tkazilgan.
Natijada 7-sentabr kuni I.Yodgorov va R.Pardayevga Ma’muriy javobgarlik to‘g‘risidagi kodeksning 41, 52-moddalari, A.Yodgorovga esa 52-moddasi bo‘yicha Ma’muriy javobgarlik to‘g‘risida ish qo‘zg‘atilib, ko‘rib chiqish uchun tuman ma’muriy sudiga yuborilgan.
Bosh prokuratura matbuot xizmati
Izoh (0)