3-sentabr, payshanba kuni Millatlar Ligasi 2020/21-yilgi mavsumi guruh bosqichiga start beriladi. Quyida ushbu turnir, uning formati va qaysi jamoalar ishtirok etishi haqida batafsil fikr yuritiladi.
Xo‘sh, Millatlar Ligasi o‘zi qanday musobaqa?
Millatlar Ligasi terma jamoalar taqvimidagi o‘rtoqlik uchrashuvlarini Jahon va Yevropa chempionatlariga chiqish imkoniyatiga ega raqobatdosh o‘yinlar bilan almashtirishga mo‘ljallangan musobaqa bo‘lib, unda faqat UEFAga a’zo davlatlar qatnashishi mumkin. 2019-yilgi (ilk marta o‘tkazilgan) musobaqada Portugaliya termasi bosh sovringa ega chiqqandi. 2020/21-yilgi mavsum esa oldingisidan ham qiziqarli va murosasiz tus olishi kutilmoqda. Shuningdek, bu yilgi formatga bir qancha o‘zgartirishlar ham kiritilgan.
Musobaqa bahslari qachon bo‘lib o‘tadi?
Musobaqa qur’asi 2020-yilning 3-martida Amsterdamda (Niderlandiya) bo‘lib o‘tgandi. Guruh bosqichining dastlabki olti turi 2020-yilning sentabr, oktabr va noyabr oylarida o‘tkazilsa, yakuniy bosqich 2021-yil iyun oyiga rejalashtirilgan. Pley-off o‘yinlari esa 2022-yilning mart oyida bo‘lib o‘tadi (tafsilotlar quyida).
Qaysi jamoalar (qanday tartibda) o‘ynaydi?
UEFA reytingiga muvofiq 55 ta terma jamoa ligalarga bo‘lib chiqilgan, jumladan, 1—16-o‘rinlar A ligadan, 17—32-pog‘onadagilar esa B ligadan, 33—48-o‘rindagi jamoalar C ligadan va 49—55-o‘rindagilar D ligadan joy olgan.
A ligasi:
- 1-guruh: Niderlandiya, Italiya, Bosniya va Gersegovina, Polsha;
- 2-guruh: Angliya, Belgiya, Daniya, Islandiya;
- 3-guruh: Portugaliya, Fransiya, Shvetsiya, Xorvatiya;
- 4-guruh: Shveysariya, Ispaniya, Ukraina, Germaniya.
- 1-guruh: Avstriya, Norvegiya, Shimoliy Irlandiya, Ruminiya;
- 2-guruh: Chexiya, Shotlandiya, Slovakiya, Isroil;
- 3-guruh: Rossiya, Serbiya, Turkiya, Vengriya;
- 4-guruh: Uels, Finlyandiya, Irlandiya, Bolgariya.
- 1-guruh: Chernogoriya, Kipr, Lyuksemburg, Ozarbayjon;
- 2-guruh: Gruziya, Shimoliy Makedoniya, Estoniya, Armaniston;
- 3-guruh: Gretsiya, Kosovo, Sloveniya, Moldova;
- 4-guruh: Albaniya, Belorussiya, Litva, Qozog‘iston.
- 1-guruh: Farer orollari, Latviya, Andorra, Malta;
- 2-guruh: Gibraltar, Lixtenshteyn, San-Marino.
Jamoalar uy-safar tizimida o‘zaro kuch sinashadi. A ligasining to‘rtta guruh g‘oliblari Millatlar Ligasining yarim final, uchinchi o‘rin uchun o‘yin va final uchrashuvlaridan iborat yakuniy bosqichga yo‘l oladi (ushbu o‘yinlar 2021-yil iyun oyiga belgilangan). B, C va D ligalarida yuqori o‘rinlarni egallagan jamoalar yuqori ligaga ko‘tarilsa, A va B ligalarida so‘nggi o‘rinlarni egallagan jamoalar pastki ligaga tushib ketadi.
C ligada to‘rtta, D ligada esa ikkita guruh bo‘lganligi uchun, ikkita jamoa C ligani tark etadi (ular 2022-yil mart oyida bo‘lib o‘tadigan pley-off bosqichida aniqlanadi). Agar C ligasi guruhida so‘nggi o‘rinni egallagan jamoa 2022-yilgi Jahon chempionatining saralash o‘yinlarida ishtirok etishi kerak bo‘lsa (tafsilotlar quyida), u holda Millatlar Ligasi reytingining 47 va 48-jamoalari avtomatik ravishda C ligasidan chiqib ketadi.
Millatlar Ligasi Jahon Chempionati bilan qanday bog‘langan?
Umuman olganda saralash formati o‘zgarmaydi. Yevropadagi o‘nta guruh g‘oliblari to‘g‘ridan to‘g‘ri Qatarga yo‘l oladi. Yana uchta jamoa esa o‘tish o‘yinlari orqali JCh yo‘llanmasini qo‘lga kiritadi, bunda saralashda ikkinchi o‘rinlarni egallagan barcha jamoalar bir-biriga qarshi o‘ynaydi. Shuningdek, guruh g‘oliblari orasidan JChga yo‘llanma olmagan va o‘tish o‘yinlarida qatnashmagan eng yaxshi ko‘rsatkichga ega bo‘lgan ikki jamoa ham yo‘llanma uchun kurashga kirishadi.
Guruh bosqichi o‘yinlari qachon o‘tkaziladi?
Millatlar Ligasining 2020/21 yilgi mavsumi guruh bosqichi o‘yinlari 3-4-5 va 6-7-8-sentabr, 10-11 va 13—14-oktabr hamda 14—15, 17—18-noyabr kunlari bo‘lib o‘tadi.
Koronavirus musobaqaga qanday ta’sir o‘tkazadi?
Uchrashuv oldidan uning barcha ishtirokchilari COVID-19’ga test topshirishga majbur. UEFAga a’zo assotsiatsiyalar aksariyati mahalliy hukumatdan futbolchilarga milliy terma jamoalar o‘yinlari uchun ruxsat olgan; futbolchilar terma jamoalar o‘yinidan so‘ng klub ixtiyoriga qaytishi mumkin bo‘ladi.
Qaysdir terma jamoada virus holati aniqlangan taqdirda ham, agar jamoada 13 nafar futbolchi sog‘ bo‘lsa, o‘yin o‘tkazilaveradi. Ushbu holatda o‘yinchilardan biri darvozabon bo‘lishi shart. Agar milliy assotsiatsiyalar ushbu shartlarni bajara olmasa, o‘yin boshqa sanaga qoldiriladi. Agar xalqaro taqvimda bo‘sh sanalar bo‘lmasa, unda UEFA o‘z tekshiruv ishlarini o‘tkazadi. Mabodo tashkilot ikkala tomonning ham aybini yoki COVID-19 yuqtirilishida hech qaysi tarafning aybi yo‘q deb topsa, u holda o‘yin o‘tkazilmagan deb hisoblanadi. Bunday vaziyatda UEFA rasmiylari tomonidan g‘olibni aniqlash uchun qur’a tashlanadi. Yakuniy natijaga esa 1:0, 0:0 va 0:1 hisoblaridan biri yoziladi (qur’a natijasiga qarab).
UEFA Millatlar Ligasi
1-tur o‘yinlari
3-sentabr, payshanba
21:00 Latviya — Andorra23:45 Germaniya — Ispaniya
23:45 Ukraina — Shveysariya
23:45 Rossiya — Serbiya
23:45 Turkiya — Vengriya
23:45 Bolgariya — Irlandiya
23:45 Finlyandiya — Uels
23:45 Moldova — Kosovo
23:45 Sloveniya — Gretsiya
23:45 Farer orollari — Malta
4-sentabr, juma
21:00 Litva — Qozog‘iston23:45 Niderlandiya — Polsha
23:45. Italiya — Bosniya va Gersegovina
23:45 Norvegiya — Avstriya
23:45 Ruminiya — Shimoliy Irlandiya
23:45 Shotlandiya — Isroil
23:45 Slovakiya — Chexiya
23:45 Belarus — Albaniya.
5-sentabr, shanba
18:00 Gibraltar — San-Marino18:00 Shimoliy Makedoniya — Armaniston
21:00 Ozarbayjon — Lyuksemburg
21:00 Kipr — Chernogoriya
21:00 Islandiya — Angliya
21:00 Estoniya — Gruziya
23:45 Daniya — Belgiya
23:45 Shvetsiya — Fransiya
23:45 Portugaliya — Xorvatiya.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)