3 сентябрь, пайшанба куни Миллатлар Лигаси 2020/21 йилги мавсуми гуруҳ босқичига старт берилади. Қуйида ушбу турнир, унинг формати ва қайси жамоалар иштирок этиши ҳақида батафсил фикр юритилади.
Хўш, Миллатлар Лигаси ўзи қандай мусобақа?
Миллатлар Лигаси терма жамоалар тақвимидаги ўртоқлик учрашувларини Жаҳон ва Европа чемпионатларига чиқиш имкониятига эга рақобатдош ўйинлар билан алмаштиришга мўлжалланган мусобақа бўлиб, унда фақат УЕФАга аъзо давлатлар қатнашиши мумкин. 2019 йилги (илк марта ўтказилган) мусобақада Португалия термаси бош совринга эга чиққанди. 2020/21 йилги мавсум эса олдингисидан ҳам қизиқарли ва муросасиз тус олиши кутилмоқда. Шунингдек, бу йилги форматга бир қанча ўзгартиришлар ҳам киритилган.
Мусобақа баҳслари қачон бўлиб ўтади?
Мусобақа қуръаси 2020 йилнинг 3 мартида Амстердамда (Нидерландия) бўлиб ўтганди. Гуруҳ босқичининг дастлабки олти тури 2020 йилнинг сентябрь, октябрь ва ноябрь ойларида ўтказилса, якуний босқич 2021 йил июнь ойига режалаштирилган. Плей-офф ўйинлари эса 2022 йилнинг март ойида бўлиб ўтади (тафсилотлар қуйида).
Қайси жамоалар (қандай тартибда) ўйнайди?
УЕФА рейтингига мувофиқ 55 та терма жамоа лигаларга бўлиб чиқилган, жумладан, 1—16-ўринлар А лигадан, 17—32-поғонадагилар эса Б лигадан, 33—48-ўриндаги жамоалар C лигадан ва 49—55-ўриндагилар Д лигадан жой олган.
А лигаси:
- 1-гуруҳ: Нидерландия, Италия, Босния ва Герсеговина, Польша;
- 2-гуруҳ: Англия, Бельгия, Дания, Исландия;
- 3-гуруҳ: Португалия, Франция, Швеция, Хорватия;
- 4-гуруҳ: Швейцария, Испания, Украина, Германия.
- 1-гуруҳ: Австрия, Норвегия, Шимолий Ирландия, Руминия;
- 2-гуруҳ: Чехия, Шотландия, Словакия, Исроил;
- 3-гуруҳ: Россия, Сербия, Туркия, Венгрия;
- 4-гуруҳ: Уэльс, Финляндия, Ирландия, Болгария.
- 1-гуруҳ: Черногория, Кипр, Люксембург, Озарбайжон;
- 2-гуруҳ: Грузия, Шимолий Македония, Эстония, Арманистон;
- 3-гуруҳ: Греция, Косово, Словения, Молдова;
- 4-гуруҳ: Албания, Белоруссия, Литва, Қозоғистон.
- 1-гуруҳ: Фарер ороллари, Латвия, Андорра, Мальта;
- 2-гуруҳ: Гибралтар, Лихтенштейн, Сан-Марино.
Жамоалар уй-сафар тизимида ўзаро куч синашади. А лигасининг тўртта гуруҳ ғолиблари Миллатлар Лигасининг ярим финал, учинчи ўрин учун ўйин ва финал учрашувларидан иборат якуний босқичга йўл олади (ушбу ўйинлар 2021 йил июнь ойига белгиланган). Б, C ва Д лигаларида юқори ўринларни эгаллаган жамоалар юқори лигага кўтарилса, А ва Б лигаларида сўнгги ўринларни эгаллаган жамоалар пастки лигага тушиб кетади.
C лигада тўртта, Д лигада эса иккита гуруҳ бўлганлиги учун, иккита жамоа C лигани тарк этади (улар 2022 йил март ойида бўлиб ўтадиган плей-офф босқичида аниқланади). Агар C лигаси гуруҳида сўнгги ўринни эгаллаган жамоа 2022 йилги Жаҳон чемпионатининг саралаш ўйинларида иштирок этиши керак бўлса (тафсилотлар қуйида), у ҳолда Миллатлар Лигаси рейтингининг 47 ва 48-жамоалари автоматик равишда C лигасидан чиқиб кетади.
Миллатлар Лигаси Жаҳон Чемпионати билан қандай боғланган?
Умуман олганда саралаш формати ўзгармайди. Европадаги ўнта гуруҳ ғолиблари тўғридан-тўғри Қатарга йўл олади. Яна учта жамоа эса ўтиш ўйинлари орқали ЖЧ йўлланмасини қўлга киритади, бунда саралашда иккинчи ўринларни эгаллаган барча жамоалар бир-бирига қарши ўйнайди. Шунингдек, гуруҳ ғолиблари орасидан ЖЧга йўлланма олмаган ва ўтиш ўйинларида қатнашмаган энг яхши кўрсаткичга эга бўлган икки жамоа ҳам йўлланма учун курашга киришади.
Гуруҳ босқичи ўйинлари қачон ўтказилади?
Миллатлар Лигасининг 2020/21 йилги мавсуми гуруҳ босқичи ўйинлари 3-4-5 ва 6-7-8 сентябрь, 10-11 ва 13—14 октябрь ҳамда 14—15, 17—18 ноябрь кунлари бўлиб ўтади.
Коронавирус мусобақага қандай таъсир ўтказади?
Учрашув олдидан унинг барча иштирокчилари COVID-19’га тест топширишга мажбур. УЕФАга аъзо ассоциациялар аксарияти маҳаллий ҳукуматдан футболчиларга миллий терма жамоалар ўйинлари учун рухсат олган; футболчилар терма жамоалар ўйинидан сўнг клуб ихтиёрига қайтиши мумкин бўлади.
Қайсдир терма жамоада вирус ҳолати аниқланган тақдирда ҳам, агар жамоада 13 нафар футболчи соғ бўлса, ўйин ўтказилаверади. Ушбу ҳолатда ўйинчилардан бири дарвозабон бўлиши шарт. Агар миллий ассоциациялар ушбу шартларни бажара олмаса, ўйин бошқа санага қолдирилади. Агар халқаро тақвимда бўш саналар бўлмаса, унда УЕФА ўз текширув ишларини ўтказади. Мабодо ташкилот иккала томоннинг ҳам айбини ёки COVID-19 юқтирилишида ҳеч қайси тарафнинг айби йўқ деб топса, у ҳолда ўйин ўтказилмаган деб ҳисобланади. Бундай вазиятда УЕФА расмийлари томонидан ғолибни аниқлаш учун қуръа ташланади. Якуний натижага эса 1:0, 0:0 ва 0:1 ҳисобларидан бири ёзилади (қуръа натижасига қараб).
УЕФА Миллатлар Лигаси
1-тур ўйинлари
3 сентябрь, пайшанба
21:00 Латвия — Андорра23:45 Германия — Испания
23:45 Украина — Швейцария
23:45 Россия — Сербия
23:45 Туркия — Венгрия
23:45 Болгария — Ирландия
23:45 Финляндия — Уэльс
23:45 Молдова — Косово
23:45 Словения — Греция
23:45 Фарер ороллари — Мальта
4 сентябрь, жума
21:00 Литва — Қозоғистон23:45 Нидерландия — Польша
23:45. Италия — Босния ва Герсеговина
23:45 Норвегия — Австрия
23:45 Руминия — Шимолий Ирландия
23:45 Шотландия — Исроил
23:45 Словакия — Чехия
23:45 Беларусь — Албания.
5 сентябрь, шанба
18:00 Гибралтар — Сан-Марино18:00 Шимолий Македония — Арманистон
21:00 Озарбайжон — Люксембург
21:00 Кипр — Черногория
21:00 Исландия — Англия
21:00 Эстония — Грузия
23:45 Дания — Бельгия
23:45 Швеция — Франция
23:45 Португалия — Хорватия.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)