Futbol bo‘yicha Pro-Liganing 4-turidan o‘rin olgan ikki o‘yin 2-sentabr, chorshanba kuni bo‘lib o‘tdi.
“Sho‘rtan” jamoasi peshqadam “Neftchi”ni qabul qildi. Uchrashuvning 60-daqiqasida Doston Toshmatov farg‘onaliklarni oldinga olib chiqdi. Biroq g‘uzorliklar so‘nggi daqiqalarda ikkita gol urgan holda g‘alabani o‘z tomoniga og‘dirdi. 89-daqiqada Shokir Yo‘ldoshev muvozanatni tiklagan bo‘lsa, hakam tomonidan qo‘shib berilgan vaqtda Shahboz Jo‘rayev “Sho‘rtan”ga g‘alaba keltirgan gol muallifiga aylandi.
“Sho‘rtan” ushbu g‘alabadan keyin ochkolarini 9 taga yetkazib olgan holda birinchi o‘ringa ko‘tarildi. Mavsumdagi ilk mag‘lubiyatni qabul qilib olgan “Neftchi” (7) esa 3-pog‘onada bormoqda.
“Xorazm” jamoasi “Oqtepa” uyida mehmon bo‘ldi. Uchrashuvning birinchi bo‘limida hisob ochilmadi. Ikkinchi bo‘limda darvozalar to‘rt bor ishg‘ol etildi.
Mazkur g‘alabadan keyin “Oqtepa” ochkolarini 7 taga yetkazib oldi va ikkinchi pog‘onaga ko‘tarildi. “Xorazm” esa ketma-ket to‘rtinchi mag‘lubiyatni qabul qilib oldi va so‘nggi o‘rinda qolmoqda.
Pro-Liga
4-tur bahslari
2-sentabr, chorshanba
“Sho‘rtan” — “Neftchi” 2:1
Gollar: 0:1 – 60 Doston Toshmatov, 1:1 – 89 Shokir Yo‘ldoshev, 2:1 – 90+3 Shahboz Jo‘rayev.“Oqtepa” — “Xorazm” 3:1
Gollar: 1:0 – 59 Idris Bikmaykin, 2:0 – 87 Ja’far Ismoilov, 2:1 – 88 Hurmatbek Yo‘ldoshev, 3:1 – 90+2 Temur Hakimov.Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)