Turkiyada IShID amiri deb gumon qilinayotgan Mahmut O‘zden fosh qilindi va Adana viloyati janubida maxsus xizmat xodimlari tomonidan hibsga olindi. Bu haqda 1-sentabr kuni Turkiya ichi ishlar vaziri Sulaymon So‘ylu ma’lum qilgan, deb yozmoqda Anadolu.
“U Iroq hamda Suriyadagi IShID a’zolari bilan doimiy ravishda aloqa qilib turgan”, – degan u.
Vazirning so‘zlariga ko‘ra, gumonlanuvchi Istanbulga yetkazilgan va sud tomonidan qamoqqa olish haqidagi qaror chiqarilgan. O‘zden Silivridagi qamoqxonaga joylashtirilgan.
Dastlabki xulosalar bo‘yicha O‘zden 10-12 kishidan iborat jangarilar guruhlarini tuzib, teraktlar tashkillashtirish bilan shug‘ullangan. Xususan, taniqli siyosatchilarga suiqasd uyushtirish, Istanbuldagi Ayo Sofiya (sobiq Avliyo Sofiya ibodatxonasi) masjidida qo‘poruvchilik harakatini amalga oshirishni rejalashtirgan.
Ma’lum bo‘lishicha, Turkiya maxsus kuchlari IShID yetakchilaridan birini qo‘lga tushirgan. Tintuv vaqtida uning yonidan portlashlar amalga oshiriladigan binolarning chizmalari topilgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)