Туркияда ИШИД амири деб гумон қилинаётган Маҳмут Ўзден фош қилинди ва Адана вилояти жанубида махсус хизмат ходимлари томонидан ҳибсга олинди. Бу ҳақда 1 сентябрь куни Туркия ичи ишлар вазири Сулаймон Сўйлу маълум қилган, деб ёзмоқда Anadolu.
«У Ироқ ҳамда Суриядаги ИШИД аъзолари билан доимий равишда алоқа қилиб турган», – деган у.
Вазирнинг сўзларига кўра, гумонланувчи Истанбулга етказилган ва суд томонидан қамоққа олиш ҳақидаги қарор чиқарилган. Ўзден Силивридаги қамоқхонага жойлаштирилган.
Дастлабки хулосалар бўйича Ўзден 10-12 кишидан иборат жангарилар гуруҳларини тузиб, терактлар ташкиллаштириш билан шуғулланган. Хусусан, таниқли сиёсатчиларга суиқасд уюштириш, Истанбулдаги Аё София (собиқ Авлиё София ибодатхонаси) масжидида қўпорувчилик ҳаракатини амалга оширишни режалаштирган.
Маълум бўлишича, Туркия махсус кучлари ИШИД етакчиларидан бирини қўлга туширган. Тинтув вақтида унинг ёнидан портлашлар амалга ошириладиган биноларнинг чизмалари топилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)