Termiz va Buxoroda imtihon kunlari ba’zi ko‘chalarda transport vositalari harakati cheklanadi

Termiz va Buxoro shahrida ayrim ko‘chalar bo‘ylab transport vositalari harakatlanishi vaqtincha to‘xtatiladi. Bu haqda viloyat axborot xizmatlari xabar berdi.

Surxondaryo viloyati hokimligi ma’lum qilinishicha, Termiz shahar hokimining farmoyishiga asosan 2020-yil 2-sentabrdan 14-sentabrga qadar test sinovlari o‘tkazilishi munosabati bilan ko‘chalar bo‘ylab transport vositalari harakati to‘xtatiladi.

• “Surxon” sport majmuasi;
• Termiz olimpiya zaxiralari maktab internati;
• “Alpomish” o‘yingohi;
• DXX futbol maydoniga olib boruvchi ko‘chalar harakat uchun yopiladi.

Shuningdek, yuqoridagi sabablarga ko‘ra, Buxoro shahrining ayrim ko‘chalarida ham transport harakati cheklanadi.

Buxoro viloyati IIB YHXB axborot xizmati xabariga ko‘ra, Buxoro shahri hokimining 2020-yil 26-avgustdagi farmoyishiga asosan Buxoro shahri Islom Karimov ko‘chasining “Dilkusho” tennis majmuasida test sinovlari o‘tkazilishi davomida shaharning Islom Karimov ko‘chasi bilan Navoiy shohko‘chalari kesishmasi, shuningdek, Sadriddin Ayniy ko‘chasida joylashgan “Umid” sport majmuasi hamda Ibrohim Mo‘minov va Hofiz Tanish Buxoriy ko‘chasi kesishmalarida joylashgan “Buxoro” sport majmuasida test sinovi o‘tkazilishi belgilangan.

Buxoro viloyati IIB YHXB katta inspektori Ulug‘bek Shukurlayev so‘zlariga ko‘ra quyidagi ko‘chalarda transport harakatiga cheklov qo‘yilgan:

• shaharning Muhammad Iqbol va Islom Karimov ko‘chalari kesishgan qismidan Zulfiya ko‘chasi bilan kesishgan qismigacha,
• Hamza ko‘chasining Hofiz tanish Buxoriy kesishgan qismidan Ibrohim Mo‘minov ko‘chasi kesishgan qismigacha,
• Ibrohim Mo‘minov ko‘chasining Hamza ko‘chasi bilan kesishgan qismidan Navoiy Shoh ko‘chasi kesishgan qismigacha, Islom Karimov ko‘chasining Vobkent ko‘chasi bilan kesishgan qismidan Ibn Sino Shoh ko‘chasi kesishgan qismigacha,
• Sadriddin Ayniy ko‘chasining Islom Karimov ko‘chasi kesishgan qismidan “Umid” sport majmuasigacha bo‘lgan oraliqda barcha turdagi yuk va yengil avto transport vositalarining harakati vaqtinchalik cheklanadi.