Термиз ва Бухорода имтиҳон кунлари баъзи кўчаларда транспорт воситалари ҳаракати чекланади

Термиз ва Бухоро шаҳрида айрим кўчалар бўйлаб транспорт воситалари ҳаракатланиши вақтинча тўхтатилади. Бу ҳақда вилоят ахборот хизматлари хабар берди.

Сурхондарё вилояти ҳокимлиги маълум қилинишича, Термиз шаҳар ҳокимининг фармойишига асосан 2020 йил 2 сентябрдан 14 сентябрга қадар тест синовлари ўтказилиши муносабати билан кўчалар бўйлаб транспорт воситалари ҳаракати тўхтатилади.

• «Сурхон» спорт мажмуаси;
• Термиз олимпия захиралари мактаб интернати;
• «Алпомиш» ўйингоҳи;
• ДХХ футбол майдонига олиб борувчи кўчалар ҳаракат учун ёпилади.

Шунингдек, юқоридаги сабабларга кўра, Бухоро шаҳрининг айрим кўчаларида ҳам транспорт ҳаракати чекланади.

Бухоро вилояти ИИБ ЙҲХБ ахборот хизмати хабарига кўра, Бухоро шаҳри ҳокимининг 2020 йил 26 августдаги фармойишига асосан Бухоро шаҳри Ислом Каримов кўчасининг «Дилкушо» теннис мажмуасида тест синовлари ўтказилиши давомида шаҳарнинг Ислом Каримов кўчаси билан Навоий шоҳкўчалари кесишмаси, шунингдек, Садриддин Айний кўчасида жойлашган «Умид» спорт мажмуаси ҳамда Иброҳим Мўминов ва Ҳофиз Таниш Бухорий кўчаси кесишмаларида жойлашган «Бухоро» спорт мажмуасида тест синови ўтказилиши белгиланган.

Бухоро вилояти ИИБ ЙҲХБ катта инспектори Улуғбек Шукурлаев сўзларига кўра қуйидаги кўчаларда транспорт ҳаракатига чеклов қўйилган:

• шаҳарнинг Муҳаммад Иқбол ва Ислом Каримов кўчалари кесишган қисмидан Зулфия кўчаси билан кесишган қисмигача,
• Ҳамза кўчасининг Ҳофиз таниш Бухорий кесишган қисмидан Иброҳим Мўминов кўчаси кесишган қисмигача,
• Иброҳим Мўминов кўчасининг Ҳамза кўчаси билан кесишган қисмидан Навоий Шоҳ кўчаси кесишган қисмигача, Ислом Каримов кўчасининг Вобкент кўчаси билан кесишган қисмидан Ибн Сино Шоҳ кўчаси кесишган қисмигача,
• Садриддин Айний кўчасининг Ислом Каримов кўчаси кесишган қисмидан «Умид» спорт мажмуасигача бўлган оралиқда барча турдаги юк ва енгил авто транспорт воситаларининг ҳаракати вақтинчалик чекланади.