Belarusda nima gap? 28-avgustning asosiy voqealari

Belarusda 9-avgustdan buyon davom etayotgan tinch namoyishlarning 28-avgust kuni bo‘lib o‘tgan eng asosiy voqealari bilan quyida tanishtiramiz.

Belarusdagi namoyishlarga birdamlik belgisi sifatida dunyoning turli burchaklaridagi belaruslar ham o‘zlari yashab turgan joylarida birdamlik aksiyalarini o‘tkazdi.

Shuningdek, bir necha kundan buyon Belarus Fanlar akademiyasi xodimlari ham norozilik namoyishlarida ishtirok etmoqda. Bugun ham ularning ayrimlari ko‘chaga chiqdi.

Minskdagi Kupalovskiy teatri xodimlari norozilik namoyishlarida qatnashgani uchun ishdan bo‘shatilgan edi. Ular esa bunga javoban har kuni teatr binosi oldida har kuni 12:00 dan 12:40 gacha turli tomoshalarni ko‘rsatmoqda. Odamlar esa ularni qo‘llab-quvvatlash maqsadida teatr yoniga keldi.

Bugun ham aktyorlar teatr binosi oldida navbatdagi tomoshalarini qo‘ydi.

Shuningdek, bugun Belarus muxolifati lideri Svetlana Tixanovskaya yaqinlashib kelayotgan Bilimlar kuni munosabati bilan mamlakatdagi o‘qituvchilarga tabrik yo‘lladi.

U Italiyaning Sky TG24 nashriga bergan intervyusida Belarusda bo‘layotgan voqealar mamlakatning ichki ishi ekanini, qolganlarni uning suverenitetitni hurmat qilishi lozimligni ta’kidladi.

Shuningdek, rasmiy hukumat bilan muloqot uchun Rossiya yordami kerak bo‘lishini ham qo‘shimcha qildi u.

Biz bilamizki, Rossiya, boshqa mamlakatlarda bo‘lgani kabi, bizning mamlakatimizda ham muayyan rol o‘ynaydi, ammo biz o‘z suverenitetimizni hurmat qilishini so‘raymiz. Belarusda yuz berayotgan hodisalar uning ichki ishi bo‘lib qolishi kerak. Agar bir kun kelib biz rasmiylar bilan muzokara qilish uchun tashqi vositachilarga muhtoj bo‘lsak, Rossiyaning yordami ham mamnuniyat bilan qabul qilinadi.

Svetlana Tixanovskaya

Bugun esa Belarus prezidenti ALeksandr Lukashenko mamlakat g‘arbida taranglik yuzaga keladigan bo‘lsa, Minsk Moskva bilan hamkorlikda harbiy amaliyotlarga kirishi mumkinligini aytib o‘tdi.

Bizda kelishuv bor. Unga aytyapman, nima qilishni o‘ylab ko‘raylik. U aytyapti: biz ularning nima xohlayotganlarini bilamiz. Putin ham bunday vaziyatlarning bir nechtasidan o‘tgan. Chechen urushi. U chegarada nima bo‘layotganini biladi. Biz u bilan kelishib oldik va birga bu muammoni yechamiz.

Aleksandr Lukashenko

Lukashenko Putinning Belarus uchun tayyorlangan guruh haqidagi so‘zlariga ham e’tibor qaratdi.

“Kecha bizning qo‘shnimiz va mening yaxshi do‘stimning gaplarini eshitdingiz. Bu ruslar Belarusni himoya qilmoqchi bo‘lgani uchun emas. Eshiting, biz o‘zimizni o‘zimiz himoya qilamiz. Ammo Rossiya prezidenti va men bo‘linsak nima bo‘lishini bilamiz”, – dedi Lukashenko.

Uning fikricha, G‘arb uchun Belarus Rossiya yo‘lidagi tramplin vazifasini o‘taydi.

Bugun Minskda Aleksandr Lukashenko foydasiga veloyurish amalga oshirildi. Unda yuqori martabali rasmiylar ham ishtirok etdi.

Kechga yaqin Minskdagi Mustaqillik maydonida joylashgan Qizil cherkov binosi oldida ayollarning navbatdagi birdamlik zanjiri hosil qilindi. Bunday zanjirlar kecha ham o‘tkazilgandi. Bunga sabab esa bir kun oldin Belarus kuch ishlatar tizimlarining cherkov eshiklarini yopib qo‘yishi bo‘ldi.

Belarusda namoyishlar davom etmoqda.