Jizzax shahri “Mirzo Ulug‘bek” mahallasi hududidagi Toshkent ko‘chasida Nexia haydovchisi o‘zidan oldinda qayrilib olayotgan boshqa bir Nexia’ni urib yuborgan. Bu haqda YHXBB axborot xizmati xabar qildi.
2002-yilda tug‘ilgan haydovchi o‘zidan oldinda chapga qayrilayotgan 1966-yilda tug‘ilgan fuqaro boshqaruvidagi Nexia’ni quvib o‘tish uchun qarama-qarshi yo‘nalishga chiqqan va mashinalar to‘qnashgan. Oqibatda yo‘l chetida savdo qilayotgan 10 yoshli bolaga jarohat yetgan.
2010-yilda tug‘ilgan jabrlanuvchi tan jarohatlari bilan shifoxonaga yotqizilgan.
Avgust oyida Nexia ishtirokidagi avariyalar O‘zbekistonning turli hududlarida sodir bo‘lgan. Xususan, 15-avgustda Sirdaryo viloyatining Yangiyer shahrida Nexia haydovchisi velosipedchini urib ketishi oqibatida jabrlanuvchi voqea joyida vafot etgan, 18-avgust kuni Namangan viloyati Pop tumanida “ZIL” va Nexia avtomashinalari ishtirokida YTHda yengil mashina haydovchisi 34 yoshli Sh.A. og‘ir tan jarohatlari olib voqea joyida halok bo‘lgan, 19-avgust kuni Qashqadaryo viloyatida Nexia va yuk mashinasi o‘rtasida sodir bo‘lgan yo‘l-transport hodisasi oqibatida uch kishi (Nexia haydovchisi 33 yoshli B.E. hamda undagi yo‘lovchilar — 67 yoshli B.X. va 1 yashar A.N.) hayotdan ko‘z yumgan.
Izoh (0)