Baxtiyor Ashurmatov: Standart vaziyatdan urilgan gol “Paxtakor” g‘alabasini ta’minladi

“Qo‘qon-1912” klubi bosh murabbiyi Baxtiyor Ashurmatov Coca-Cola Superliga 10-turi doirasida “Paxtakor”ga qarshi kechgan o‘yindan (1:3) keyin o‘z fikrlari bildirib o‘tdi.

Hozirgi holatimizdan kelib chiqsak yomon o‘yin ko‘rsatmadik deb o‘ylayman. “Paxtakor” tarkibida tajribali va mahoratli futbolchilar jamlangan. Bu uchrashuvda muhim rolni o‘ynadi. Raqib mahorat va vaziyatlardan foydalanish hisobiga g‘alaba qozondi. Mag‘lubiyatga uchraganimizga qaramasdan yigitlar oxirigacha kurashdi. Jangovar futbol namoyish qildi. Afsuski, biz vaziyatlardan unumli foydalana olmadik.

Omad yetishmayapti. Lekin, jamoa faqat uchinchi goldan keyin hujumga o‘tishni boshladi degan fikrga qo‘shilmagan bo‘lardim. Birinchi bo‘lib “Paxtakor” darvozasi oldida vaziyat yaratdik, Sardor Azimovda imkoniyat bo‘ldi, Shohnazar Norbekov vaziyat yaratdi. Birinchi gol bo‘lguniga qadar “Paxtakor” darvozamiz oldida birorta vaziyat yaratgani yo‘q. Standart vaziyatdan urilgan gol raqib g‘alabasini ta’minladi. Yana bir narsaga e’tibor berishlaringni so‘rardim, garchi biz “Paxtakor” bilan o‘ynagan bo‘lsakda ikkita hujumchi bilan bahsni boshladik. Bu juda kam uchraydigan holat hisoblanadi. Har bir murabbiyni o‘z uslubi bor. Ammo, ko‘p jamoalar “Paxtakor”ga qarshi bitta hujumchi bilan o‘ynaydi. “Paxtakor” bilan o‘yinda chuqur himoyaga yotib olsak baribir ertami kechmi gol o‘tkazib yuborardik.

Gapni ochig‘i, mag‘lubiyatga uchragandan keyin Murod Xolmuhammedov yoki Quvondiq Ro‘ziyev yo‘q edi deb bahona qilish noto‘g‘ri bo‘ladi. Ular yetakchi futbolchilarimiz hisoblanadi. “Lokomotiv” bilan uchrashuvgacha emas, undan keyingi turlargacha qaytadi degan umiddaman. Muzaffar Muzaffarov “Qizilqum” bilan o‘rtoqlik uchrashuvida oyog‘idan yana jarohat oldi, u ham yaqin orada bizga yordam bera olmaydi.

Baxtiyor Ashurmatov, “Qo‘qon-1912” bosh murabbiyi