Ikkita beluxa Shanxay okeanariumdan ozod qilindi. Ular erkin suzishga qo‘yib yuboriladi

Kichkintoy Oppoq va Kichkintoy Kulrang nomli beluxalar (delfin) Shanxay okeanariumidan Islandiyaning Klettsvik ko‘rfazidagi qo‘riqxonaga o‘tkazildi, deb xabar berdi CNN.

Ushbu beluxalar Rossiya sohillarida juda kichikligida ushlangan va 2011-yilda Rossiya tadqiqot markazidan Xitoy okeanariumiga ko‘chirilgan. Beluxalarni dengizga qaytarish g‘oyasi kitlar va delfinlarning tutqinlikda yashashiga qarshi bo‘lgan Merlin Entertainments kompaniyasi tomonidan okeanarium sotib olinganidan keyin paydo bo‘ldi. Hozirda beluxalarning uyi ularning tabiiy yashash sharoitiga maksimal yaqinlashtirilgan.

https://www.instagram.com/p/CCOc89DAWTI/?utm_source=ig_embed

Beluxalarni Islandiyaga olib borish oson bo‘lmagan. Har bir beluxaning og‘irligi bir tonnadan oshadi va kun davomida 50 kg baliq iste’mol qiladi. Ularni tashish uchun buyurtmaga katta zambil ishlab chiqarildi va juda ko‘p suv va muz ishlatildi. Ushbu operatsiyaga bir qancha veterinar jalb etildi.

Beluxalarni ko‘chirishning oxirgi bosqichi koronavirus pandemiyasi sababli yanada murakkablashdi, chunki ko‘chishga yordam beradigan mutaxassislarni topish muammoga aylangandi. Bundan tashqari, beluxalarni Islandiyaga olib borganlar ham karantinga yuborilgan.

https://www.instagram.com/p/B_3C6CrpD2_/?utm_source=ig_embed

Beluxani erkin suzishga qo‘yishdan avval ularning yangi uylari – ko‘rfazning sovuq suviga moslashishi uchun  “iqlimlashtirish makoni”ga joylashtirildi.

Kichkintoy Oppoq hamda Kichkintoy Kulrangni ko‘chirishga yordam bergan Sea Life Trust xayriya tashkilotining hisob-kitobiga ko‘ra, dunyo bo‘yicha 300 dan ortiq beluxa mavjud. Tashkilot rahbarining fikriga ko‘ra, beluxalarning dengizga qaytishi kitlar uchun ham yangi bosqich bo‘ladi.

Ma’lumot uchun, beluxa (Delphinapterus leucas) — delfinsimonlar oilasiga mansub sut emizuvchi hayvon urug‘ining yagona vakili. Tanasining uzunligi 6 metrgacha, og‘irligi 1,5 tonnagacha. Beluxalar Shimoliy Muz okeani va u bilan tutashgan dengizlarda tarqalgan bo‘lib, muzlar orasida ham uchraydi. Boshining peshona qismidagi mustahkam qadog‘i yordamida muzlarni bemalol yorib suzib yuradi. Baliqlar, qisqichbaqasimonlar va boshqa mayda hayvonlar bilan oziqlanadi. Baliqlar galalarining orqasidan daryolarga ham o‘tadi. Beluxalar poda bo‘lib yashaydi. Yirik (1,5 m keladigan) bola tug‘adi. Tutqinlikka yaxshi chidaydi. Go‘shti, terisi va yog‘i uchun cheklangan miqdorda ovlanadi.