2020-yilning 4-avgust kuni Uzbekistan Airways aviakompaniyasining navbatdagi parvozi bilan COVID-19 pandemiyasi davrida kuchaytirilgan cheklovlar sababli o‘z vaqtida doimiy yashash joyiga qayta olmagan 270 nafar o‘zbekistonlik, jumladan, 5 nafar voyaga yetmagan bola Turkiyadan O‘zbekistonga qaytarildi, deb xabar bermoqda O‘zbekistonning Istanbuldagi bosh konsulxonasi.
Qayd etilishicha, O‘zbekistonning Turkiyadagi elchixonasi va Bosh konsulxonasi tomonidan ko‘rilgan tezkor chora-tadbirlar natijasida tegishli reys orqali 4-avgust kuni Istanbulning kasalxonalaridan birida vafot etgan R.M. ning jasadini ham O‘zbekistonga yuborishga erishilgan.
Shuningdek, ayrim yo‘lovchilarning belgilangan vaqtda yetib kelmagani sababli konsullar tomonidan qo‘shimcha 20 kishini mazkur reysdagi ro‘yxatga kiritishga erishilgan. Bunda asosan homilador, ko‘p bolali va bemor fuqarolarga ustuvorlik berilgan.
“Bundan tashqari, reysga ro‘yxatdan o‘tish jarayonida yo‘lovchilardan biri bilan bog‘liq noodatiy holat yuzaga kelgan. Ushbu yo‘lovchi tahdid va “shantaj qilgan” holda, avval sotib olingan “Turk havo yo‘llari” aviakompaniyasining chiptasi bilan uchib ketishga uringan. Yangi aviabilet sotib olishni rad etgani sababli yo‘lovchi uchib keta olmadi”, – deyiladi Instanbuldagi bosh konsulxona xabarida.
Fuqaroning avval xarid qilgan chiptasi bilan O‘zbekistonga kelishga uringani, qolgan o‘zbekistonliklarning Uzbekistan Airways aviakompaniyasining chiptalarini qanday narxda xarid qilganiga xabarda aniqlik kiritilmagan.
Konsulxona axborotiga ko‘ra, reysga ro‘yxatdan o‘tganlar orasida Turkiya migratsiya qonunchiligini buzganlik sababli qolib ketganlar kuzatilmagan.
Ushbu parvozni tashkillashtirish jarayonida ba’zi guruhlarning parvozga navbatsiz qo‘yishni va’da qilib, O‘zbekiston fuqarolaridan tovlamachilik yo‘li bilan pul undirayotgan holatlar kuzatilgan. O‘rganishlar natijasida, tovlamachilar taklif qilgan chiptalarning charter reysi uchun o‘tmasligi aniqlangan.
O‘zbekistonning Istanbuldagi bosh konsulxonasi muayyan to‘lovlar evaziga O‘zbekistonga yuborishni va’da qilayotgan shaxslar, bu boradagi firibgarlik holatlari bo‘yicha ma’lumot berishni so‘ragan va elchixona, Bosh konsulxonaning charter reyslari uchun ro‘yxatlarni shakllantirish bo‘yicha vakolat berilgan har qanday “vakillar”i yoki “ishonchli shaxslar”i mavjud emasligini bildirgan.
Turkiyaning Istanbul shahrida 2020-yilning 16 va 30-iyul kunlari Turkish Airlines aviakompaniyasi tomonidan tashkil etilgan charter reysda jami 42 nafar o‘zbekistonlik yo‘lovchi parvozdan qolib ketgani xabar qilingan. Keyinchalik O‘zbekistonning Istanbuldagi bosh konsulxonasi mazkur holat yuzasidan izoh bergandi.
Shuningdek, 31-iyulda 144 nafar fuqaro mehnat faoliyatini amalga oshirish uchun O‘zbekistondan Rossiyaning Amur viloyatiga jo‘natilgani, 1-avgustda Respublika maxsus komissiyasining qaroriga muvofiq, xorijdagi o‘zbekistonliklarni olib kelish uchun 2-avgustdan 16-avgustga qadar amalga oshiriladigan navbatdagi charter reyslarning jadvali tasdiqlangani hamda AllTrip.uz kompaniyasi Windrose aviakompaniyasi bilan hamkorlikda Ukrainadan O‘zbekistonga qaytish istagida bo‘lgan yo‘lovchilar uchun Kiyev—Xarkov—Toshkent—Kiyev yo‘nalishida charter qatnovini amalga oshirishi xususida xabarlar berilgan.
Izoh (0)