Turkiyaning Istanbul shahrida 2020-yilning 16 va 30-iyul kunlari Turkish Airlines aviakompaniyasi tomonidan tashkil etilgan charter reysda jami 42 nafar o‘zbekistonlik yo‘lovchi parvozdan qolib ketgan. Ayrimlarining yuklari esa Toshkentda egalarini kutmoqda, deb xabar beradi “Kun.uz”.

Foto: Depositphotos

Ma’lum qilinishicha, Turkiyaning Istanbul shahrida bir necha o‘n o‘zbekistonlik fuqaro charter reysga chipta xarid qilgani holda reysdan qolib ketgan.

Ta’kidlanishicha, fuqarolarga charter reysga navbati kelgani haqida qo‘ng‘iroq qilib xabar berilgan, qayerdan chipta olish kerakligi aytilgan, borib 500 dollar atrofida pulini to‘lab, chipta olgan, aeroportda ro‘yxatdan o‘tgan, chegara postida Turkiyadan ketgani qayd qilinib, muhr bosilgan, ayrimlarining chiptasidagi talon qismi ham yirtib olingani holda reysdan qolib ketishgan.

Ma’lumotlarga ko‘ra, 30-iyul kuni Istanbul–Toshkent–Istanbul yo‘nalishi bo‘yicha Turkish Airlines aviakompaniyasi tomonidan charter reys amalga oshirilgan. Tushuntirishlaricha, jami 31 o‘zbekistonlik yo‘lovchi qo‘lida chiptasi bilan samolyotdan qolib ketgan. Reys qatnovlar jadvali bo‘yicha soat 15:30 ga belgilangan va o‘z vaqtida parvozni amalga oshirgan.

Ayrimlarining chiptasi va pasportlariga chegara nazorati muhri ham bosilgan. Charter reysdan qolib ketganlar orasida yuklari O‘zbekistonga ketganlar bor. Ular qo‘llarida pasport bilan qolishgan xolos. Vaholanki, ular orasida konsullik qo‘ng‘irog‘idan keyin 516 dollarga chipta olib, o‘z vaqtida aeroportga borganlar ham bor.

Foto: “Kun.uz”

Foto: “Kun.uz”

Turli yo‘lovchilar tomonidan taqdim etilgan audioyozuvlarda ta’kidlanishicha, ular “jazo to‘lovi”ni (Turkiya migratsiya qonunchiligini buzgani uchun to‘lanadigan jarima) amalga oshirish uchun navbat kutib turgan vaqtlarida aviakompaniya vakili kelib, samolyot uchib ketganini ma’lum qilgan. Ularga ko‘ra, konsullik ro‘yxatiga kirmagan yo‘lovchilar ham kelib, 480 dollardan chipta xarid qilib, O‘zbekistonga ketishga muvaffaq bo‘lgan. Qolaversa, murojaatchilar samolyotdagi o‘rindiqlardan ortiqcha chipta sotilganini ham iddao qilmoqda.

Istanbul aeroportida ro‘y bergan holat bo‘yicha izoh olish uchun Turkish Airlines’ning Toshkentdagi vakolatxonasi vakili bilan bog‘lanilib, bir necha savollar bilan murojaat qilingan. Uning javoblari quyidagicha bo‘lgan:

  • Turkiyadagi o‘zbeklarni evakuatsiya qilish bo‘yicha charter reys ro‘yxatiga aviakompaniyaning umuman aloqasi yo‘q, ro‘yxat bo‘yicha yo‘lovchilarga qo‘ng‘iroq qilish va aeroportga kelishi, chipta xarid qilishlarini nazorati O‘zbekistonning Istanbuldagi bosh konsulligi vakolatiga kiradi.
  • Murojaatchilar ta’kidlaganidek, charter reysga chiptalar faqat konsullik taqdim etgan ro‘yxat bo‘yicha sotiladi, ro‘yxatga kiritilmagan fuqarolarga chipta sotilmaydi. Aviakompaniya vakilining aytishicha, konsullik vakili ro‘yxatga kiritilganlar yetib kelmagan taqdirda boshqa fuqarolarga chipta sotishga ruxsat berishi mumkin.
  • Evakuatsiya maqsadida tashkil etilgan charter reyslar belgilangan vaqtida amalga oshiriladi, ularni kechiktirish imkoni yo‘q. Maxsus buyurtmali charter reyslargina buyurtmachi istagan vaqtdagina parvoz qilishi mumkin.
  • Chiptalarning ro‘yxatga olinishi, pasportlarga muhr bosilgani, hatto chiptaning samolyotga chiqish taloni yirtib olingani holda qolib ketgan yo‘lovchilar holati esa alohida o‘rganilishi kerak.

Shu bilan birga, 16-iyulda qolib ketgan 11 yo‘lovchining barchasi bir necha kundan so‘ng xavfsizlik xodimlari tomonidan shifoxonaga, keyin chet elliklar saqlanadigan punktga olib borilgan. Ularning ichidagi ayollar O‘zbekistonga yuborilgani, biroq 6 nafar o‘zbekistonlik erkak Istanbuldan ming kilometr uzoqda hamon saqlab turilgani aytilmoqda.

Foto: “Kun.uz”

Murojaatchilarning alohida uqtirishlaricha, ushbu charter reyslarni nazorat qilish mas’uliyati O‘zbekistonning Istanbuldagi bosh konsulligi zimmasida bo‘lsa-da, 16 va 30-iyul kungi charter reyslarda konsullikning biror xodimi bo‘lmagan.

Nashr muxbiri ayni holatga oydinlik kiritish maqsadida O‘zbekistonning Istanbuldagi bosh konsulligining Telegram sahifasiga murojaat qilgan. Biroq hozirgacha javob kelmagan.

Foto: “Kun.uz”

“Shu bilan birga, bugungi kunda ‘Turk havo yo‘llari’ tomonidan tashkil etiladigan navbatdagi Istanbul–Toshkent–Istanbul reysi 14-avgustda amalga oshirilishi inobatga olinsa, aeroportda qolib ketgan o‘zbekistonliklarga bu muddat davomida kim tomonidan, qanday yordam ko‘rsatiladi, degan savol hamon ochiq qolmoqda”, — deyiladi xabarda.

Eslatib o‘tamiz, Respublika maxsus komissiyasining qaroriga muvofiq, xorijdagi o‘zbekistonliklarni olib kelish uchun 2-avgustdan 16-avgustga qadar amalga oshiriladigan navbatdagi charter reyslar jadvali tasdiqlangan.