2020 йилнинг 4 август куни Uzbekistan Airways авиакомпаниясининг навбатдаги парвози билан COVID-19 пандемияси даврида кучайтирилган чекловлар сабабли ўз вақтида доимий яшаш жойига қайта олмаган 270 нафар ўзбекистонлик, жумладан, 5 нафар вояга етмаган бола Туркиядан Ўзбекистонга қайтарилди, деб хабар бермоқда Ўзбекистоннинг Истанбулдаги бош консулхонаси.
Қайд этилишича, Ўзбекистоннинг Туркиядаги элчихонаси ва Бош консулхонаси томонидан кўрилган тезкор чора-тадбирлар натижасида тегишли рейс орқали 4 август куни Истанбулнинг касалхоналаридан бирида вафот этган Р.М. нинг жасадини ҳам Ўзбекистонга юборишга эришилган.
Шунингдек, айрим йўловчиларнинг белгиланган вақтда етиб келмагани сабабли консуллар томонидан қўшимча 20 кишини мазкур рейсдаги рўйхатга киритишга эришилган. Бунда асосан ҳомиладор, кўп болали ва бемор фуқароларга устуворлик берилган.
«Бундан ташқари, рейсга рўйхатдан ўтиш жараёнида йўловчилардан бири билан боғлиқ ноодатий ҳолат юзага келган. Ушбу йўловчи таҳдид ва «шантаж қилган» ҳолда, аввал сотиб олинган «Турк ҳаво йўллари» авиакомпаниясининг чиптаси билан учиб кетишга уринган. Янги авиабилет сотиб олишни рад этгани сабабли йўловчи учиб кета олмади», – дейилади Инстанбулдаги бош консулхона хабарида.
Фуқаронинг аввал харид қилган чиптаси билан Ўзбекистонга келишга урингани, қолган ўзбекистонликларнинг Uzbekistan Airways авиакомпаниясининг чипталарини қандай нархда харид қилганига хабарда аниқлик киритилмаган.
Консулхона ахборотига кўра, рейсга рўйхатдан ўтганлар орасида Туркия миграция қонунчилигини бузганлик сабабли қолиб кетганлар кузатилмаган.
Ушбу парвозни ташкиллаштириш жараёнида баъзи гуруҳларнинг парвозга навбатсиз қўйишни ваъда қилиб, Ўзбекистон фуқароларидан товламачилик йўли билан пул ундираётган ҳолатлар кузатилган. Ўрганишлар натижасида, товламачилар таклиф қилган чипталарнинг чартер рейси учун ўтмаслиги аниқланган.
Ўзбекистоннинг Истанбулдаги бош консулхонаси муайян тўловлар эвазига Ўзбекистонга юборишни ваъда қилаётган шахслар, бу борадаги фирибгарлик ҳолатлари бўйича маълумот беришни сўраган ва элчихона, Бош консулхонанинг чартер рейслари учун рўйхатларни шакллантириш бўйича ваколат берилган ҳар қандай «вакиллар»и ёки «ишончли шахслар»и мавжуд эмаслигини билдирган.
Туркиянинг Истанбул шаҳрида 2020 йилнинг 16 ва 30 июль кунлари Turkish Airlines авиакомпанияси томонидан ташкил этилган чартер рейсда жами 42 нафар ўзбекистонлик йўловчи парвоздан қолиб кетгани хабар қилинган. Кейинчалик Ўзбекистоннинг Истанбулдаги бош консулхонаси мазкур ҳолат юзасидан изоҳ берганди.
Шунингдек, 31 июлда 144 нафар фуқаро меҳнат фаолиятини амалга ошириш учун Ўзбекистондан Россиянинг Амур вилоятига жўнатилгани, 1 августда Республика махсус комиссиясининг қарорига мувофиқ, хориждаги ўзбекистонликларни олиб келиш учун 2 августдан 16 августга қадар амалга ошириладиган навбатдаги чартер рейсларнинг жадвали тасдиқлангани ҳамда AllTrip.uz компанияси Windrose авиакомпанияси билан ҳамкорликда Украинадан Ўзбекистонга қайтиш истагида бўлган йўловчилар учун Киев—Харков—Тошкент—Киев йўналишида чартер қатновини амалга ошириши хусусида хабарлар берилган.
Изоҳ (0)