COVID-19 pandemiyasi dunyodagi ta’limning eng katta uzilishiga olib keldi. Bu haqda Birlashgan Millatlar Tashkiloti bosh kotibi Antoniu Guterrish ma’lum qildi.
Bosh kotibning so‘zlariga ko‘ra, iyul oyi o‘rtalariga kelib 160 dan ortiq mamlakatda maktablar yopildi, bu esa 1 milliarddan ortiq o‘quvchilarga ta’sir ko‘rsatmoqda. Dunyo bo‘yicha kamida 40 million bola juda muhim sanalgan maktabgacha ta’lim olishdan mosuvo bo‘lgan.
Gutterishning ta’kidlashicha, ota-onalar, ayniqsa, ayollar uydagi yaqinlariga g‘amxo‘rlik qilishning og‘ir yukini o‘z zimmalariga olishga majbur bo‘lgan.
“Radio, televideniye va internetdagi darslarga, shuningdek, o‘qituvchilar va ota-onalarning sa’y-harakatlariga qaramay, ko‘plab o‘quvchilar hali ham bu borada qamrab olinmagan. Imkoniyati cheklangan, ozchilik va nochor jamoalar, qochqinlar, shuningdek, chekka hududlarda yashovchi o‘quvchilar kerakli ta’limni ololmaslik xavfi mavjud.
Masofadan o‘qish imkoniyatiga ega bo‘lganlar uchun ham muvaffaqiyat ularning yashash sharoitlariga, shu jumladan, uy vazifalari qanchalik to‘g‘ri taqsimlanganiga bog‘liq”, — deydi Antoniu Guterrish.
BMT bosh kotibining ma’lum qilishicha, dunyo pandemiyadan oldin ham ta’lim inqiroziga duch kelgan, turli mamlakatlarda maktab yoshidagi 250 milliondan ortiq bola maktabga bora olmagan va rivojlanayotgan mamlakatlarda o‘quvchilarning atigi to‘rtdan bir qismi zarur bazaviy ko‘nikmalarni egallagan.
Guterrish hukumatlar tomonidan bugun qabul qilinadigan qarorlar yuz millionlab yoshlarga va mamlakatlarning o‘nlab yillar davomida rivojlanish istiqbollariga ta’sir qilishi haqida ogohlantirdi.
https://youtu.be/EwQnrxkySYU
Vaziyatni to‘g‘rilash uchun BMT rahbari xalqaro sheriklar bilan birgalikda “Kelajagimizni qutqaring” shiori ostida kampaniya boshlaganini e’lon qildi. U mamlakatlar rasmiylarini to‘rtta muhim yo‘nalish bo‘yicha harakat qilishga chaqirdi.
Birinchidan, BMT rahbarining so‘zlariga ko‘ra, davlatlar maktablarni qayta ochishi kerak, kasallik tarqalishi nazorat ostida bo‘lgandan so‘ng o‘quvchilarni eng xavfsiz sharoitda maktab va o‘quv muassasalariga qaytarish kerak.
Ikkinchidan, moliyaviy oqimlarni taqsimlashda ta’limga ustuvor ahamiyat berish kerak. Inqirozdan oldin ham past va o‘rta daromadli mamlakatlarda ta’limni moliyalashtirishdagi kamchilik yiliga 1,5 trillion AQSh dollariga teng bo‘lgan. Bosh kotibning fikricha, ta’lim budjeti himoyalanishi va oshirilishi lozim.
Uchinchidan, ma’rifiy tashabbuslar boshqalardan ortda qolib ketish xavfi yuqori bo‘lganlarga – favqulodda va inqirozli vaziyatlarda yashovchi, ozchilik guruhlarining vakillari, boshqa mamlakatlarga ko‘chganlar va nogironlarga yo‘naltirilishi kerak.
To‘rtinchidan, raqamli savodxonlik va infratuzilishga sarmoyalar, bilim olishni o‘rganishda evolyutsiya, uzluksiz ta’lim konsepsiyasini modernizatsiya qilish va rasmiy hamda norasmiy ta’lim o‘rtasidagi mustahkam aloqalar o‘rnatish lozim.
“Ta’lim kelajagi xavf ostida. Biz dunyo bo‘ylab bolalar va yoshlar kelajagining burilish nuqtasida yashayapmiz”, – dedi Antoniu Guterrish.
Mavzuga doir:
Izoh (0)