Dog‘iston senatori Sulaymon Kerimovning oilasi Forbes Real Time ro‘yxatining rossiyalik milliarderlar reytingida birinchi o‘ringa chiqib oldi. 5-avgust soat 18:00 holatiga ko‘ra jurnal Kerimovlar oilasining boyligini 24,7 milliard AQSh dollariga baholagan.
Kerimov va uning oilasi “Nornikel” egalaridan biri hisoblangan Vladimir Potaninni ikkinchi pog‘onaga tushirib yuborgan, uning boyligi 24,6 milliard dollarga baholangan.
Forbes’ning qayd etishicha Kerimov reytingda ilk bor birinchi o‘ringa ko‘tarildi. Nashr senator oilasi boyligining asosiy manbasi Rossiyadagi eng katta oltin ishlab chiqaruvchi kompaniya “Polyus” aksiyalari ekanini yozmoqda, kompaniya qimmatli qog‘ozlari Sulaymon Kerimovning o‘g‘li Saidga tegishli.
“Polyus” aksiyalari narxi 5-avgust kuni Moskva birjasida 3,59 foizga ko‘tarilgan. 2020-yil boshidan buyon kompaniya deyarli ikki yarim baravarga qimmatlashgan, oltin narxi esa 34 foizgacha oshgan.
Yil boshida oltin unsiyasi uchun 1521 dollar bo‘lgan, 4—5-avgust kunlari oltin narxi bir unsiya uchun 2041-2043 dollargacha baholangan.Oltin narxi tarixda ilk bora unsiyasi uchun 2 ming dollardan qimmat deb baholandi. Bloomberg nashrining yozishicha, oltin dunyo iqtisodiyoti inqirozdan chiqishga urinayotgan ayni vaqtda daromadlarni saqlab turish vositasiga aylanib bormoqda. Goldman Sachs tahlilchilarining fikricha oltin narxi unsiya uchun 2300 dollargacha ko‘tarilishi mumkin.
Sulaymon Kerimov Forbes’ning 2020-yil uchun rossiyalik milliarderlar reytingida 13-o‘rinni egallagan. Iyul oyi oxirida jurnal Kerimovni COVID-19 epidemiyasi davridagi eng boy milliarderlardan biri sifatida e’tirof etgan.
Izoh (0)