Farg‘onada 15 ming kishiga koronavirusga qarshi bepul dori-darmon va himoya vositalari tarqatildi

Farg‘onada viloyat hokimligi tashabbusi bilan 15 ming ehtiyojmand fuqaroga koronavirusga qarshi dori-darmon va himoya vositalari tarqatildi. Bu haqda “Daryo” muxbiri xabar berdi.

Qayd etilishicha, maxsus dori qutilarida bakteriya hamda viruslarga qarshi, immunitetni ko‘taruvchi 21 turdagi dori vositalari, vitaminlar, tibbiy niqoblar va antiseptik gellar jamlangan.

Ikkinchi jahon urushi qatnashchilari, ko‘p yillik xizmatlari hamda mehnatlari uchun mukofotlangan faxriylar, xizmat vaqtida vafot etgan harbiylar oilasi, afg‘on urushi ishtirokchilari, nogironligi bo‘lgan fuqarolar, chin yetimlar, ehtiyojmand oilalarga qiymati 350 ming so‘m bo‘lgan dori-darmonlar to‘plami bepul yetkazib berilgan.

Ta’kidlanishicha, viloyatda pandemiya sharoitida bemorlarni davolash va karantin choralari asosida yakkalash maqsadida mavjud quvvatga qo‘shimcha tarzda 30 dan ortiq sanatoriy, sport zallari va boshqa obyektlar negizida 12 ming 600 ta o‘rin-joy zaxirasi shakllantirilgan.

Karantin vaqtida koronavirus bemorlarini davolash va kasallik profilaktikasi uchun zarur bo‘lgan dori-darmon va tibbiy buyumlarning uch oylik zaxirasini yaratish uchun viloyat budjetining orttirib bajarilgan qismidan 10 milliard so‘m mablag‘ ajratilgan.

Tayyorlangan zaxira o‘rin-joylari hamda maxsus taqsimlash maskanlariga 500 nafar shifokor, 1500 nafar hamshira jalb etilib, ularga 1 million va 500 ming so‘mdan avans mablag‘lari to‘lab berilgan.

Koronavirusga shubha qilingan bemorlar bilan ishlaydigan alohida mobil guruhlar tashkil etilgan. Bu mobil guruhlarga har bir shahar, tuman uchun viloyat hokimligi tomonidan Damas, 500 ta kislorod apparati, 200 ta pulsoksimetr va 50 mingta ekspress testlarga buyurtma berilgan.