Sankt-Peterburgdagi o‘zbek diasporasi vakili, “Turon” o‘zbeklar jamiyati prezidenti Valisher Haydarov pandemiyada ish sharoitlari yomonlashgani sabab migrantlar Peterburgdan qaytib kelishni istayotganini ma’lum qildi, deb xabar beradi “Rosbalt”.
Ta’kidlanishicha, Haydarovga o‘zbekistonlik muhojirlar doimiy ravishda ish haqi bo‘yicha qarzdorlik, soxta firmalar orqali ishga joylashish holatlari to‘g‘risida shikoyatlar bilan murojaat qilmoqda. Shu bilan birga, huquqni muhofaza qilish idoralariga murojaat qilish yordam bermayapti.
Haydarovning so‘zlariga ko‘ra, bu vaziyatda muhojirlarning o‘zi qisman aybdor, sababi ular mahalliy qonunlarni bilmaydi va “ish beruvchiga zarur hujjatlarni” pul olish umidida imzolaydi, ammo bu ro‘y bermaydi, deya ta’kidlaydi u.
“Ishoning, butun bir poyezdga sig‘adigan miqdordagi fuqarolar uyga qaytishni xohlayapti. Iloji bo‘lganda ketishardi. Bir charter reysga 150 ga yaqin kishi ro‘yxatga olinadi, ammo 20-30 nafar olib ketiladi, asosan, keksa odamlar va bolali ayollar. Konsullik yonida odam to‘lib yotibdi”, — dedi Haydarov.
Uning fikricha, o‘zbekistonliklar orasida norozilik kayfiyati kuchaymoqda, ularning aksariyati umidsizlikdan chegarani noqonuniy kesib o‘tishga harakat qilmoqda.
“Ular vatanni sog‘ingani uchun uyga qaytishni xohlayotgani yo‘q. Bu yerda yeyishga narsa qolmagan, ovqat olish uchun puli ham yo‘q”, — deydi Valisher Haydarov.
Avvalroq Tomskdagi o‘zbekistonlik talabalar bosh vazir Abdulla Aripovga videomurojaat yo‘llab, uylariga qaytish uchun charter reys tashkillashtirib berishni iltimos qilishgan edi. Shundan so‘ng, Prezident Shavkat Mirziyoyevning topshirig‘iga binoan Rossiyaning Novosibirsk shahridan 200 ga yaqin o‘zbekistonlik talaba charter reys orqali Toshkentga olib kelingan edi.
Ko‘p o‘tmay Qozondagi 400 ga yaqin o‘zbekistonlik talabalar ham O‘zbekiston Prezidentiga videomurojaat yo‘llab, o‘zlari uchun charter reys tashkillashtirilib berilishini iltimos qilgandi.
Izoh (0)