2020-yilning yanvar—iyun oylarida 74,6 mingta o‘lim qayd etilgan bo‘lib, mos ravishda 1000 aholiga nisbatan o‘lim koeffitsiyenti 4,4 promilleni tashkil etdi. Bu haqda Davlat statistika qo‘mitasi ma’lumotlarida keltirilgan.
Ma’lumotlarga ko‘ra, o‘lim holatlari 2019-yilning mos davriga nisbatan 0,1 promillega tushganligi (2019-yilning yanvar—iyun oylarida 4,5 promille bo‘lgan) kuzatildi.
2020-yilning yanvar—iyun oylarida qayd etilgan o‘lim holatining:
- 59,3 foizi qon aylanish tizimi kasalliklaridan;
- 9,5 foizi o‘simtalardan;
- 4,9 foizi ovqat hazm qilish a’zolari kasalliklaridan;
- 4,8 foizi baxtsiz hodisa, zaharlanish va jarohatlanishdan;
- 4,7 foizi nafas olish a’zolari kasalliklaridan;
- 1,3 foizi yuqumli va parazitar kasalliklardan;
- 15,5 foizi boshqa kasalliklardan
Ro‘yxatga olingan 1 yoshgacha vafot etgan bolalar soni 4,1 ming nafarni tashkil etib, ularning:
- 52,7 foizi perinatal davrda yuzaga keladigan holatlardan;
- 22,3 foizi nafas olish a’zolari kasalliklaridan;
- 10,7 foizi tug‘ma anomaliyalardan;
- 3,6 foizi yuqumli va parazitar kasalliklardan;
- 1,9 foizi baxtsiz hodisa, zaharlanish va jarohatlanishdan;
- 0,6 foizi ovqat hazm qilish a’zolari kasalliklaridan;
- 8,2 foizi boshqa kasalliklardan
Shuningdek, 2020-yilning yanvar—iyun oylarida 365,2 mingta bola tug‘ilganligi qayd etilgan bo‘lib (faqat tirik tug‘ilganlar inobatga olingan), mos ravishda 1000 aholiga nisbatan tug‘ilish koeffitsiyenti 21,6 promilleni tashkil etgan. Bu 2019-yilning mos davriga nisbatan 0,6 promillega oshgan (2019- yilning yanvar—iyun oylarida 21,0 promille bo‘lgan).
Ma’lumot uchun, Sog‘liqni saqlash vazirligi ma’lumotlariga ko‘ra, O‘zbekistonda pandemiya boshlanganidan buyon 122 kishi koronavirus qurboniga aylangan. “Daryo” hisobi bo‘yicha koronavirus chalingach vafot etganlar soni 128 nafarni tashkil etmoqda.
Izoh (0)