O‘zbekistonda 28-iyul soat 10:00 holatiga ko‘ra 9 710 nafar bemor koronavirus infeksiyasidan davolanmoqda. Bu haqda Sog‘liqni saqlash vazirligi xabar bermoqda.
“Hozirda mamlakatimizda 9 710 nafar bemorga shifokorlarimiz tomonidan belgilangan standartlar bo‘yicha davo choralari ko‘rilmoqda”, — deyiladi SSV axborotida. Ularning qanchasida kasallik simptomlarsiz kechayotgani, qanchasi kasalxonalarda davolanayotganiga aniqlik kiritilmagan.
Qayd etish joiz, SSVning 27-iyul kuni soat 23:30 dagi axborotida O‘zbekiston “tibbiyot muassasalarida 9 414 nafar bemor davolanayotgani” ta’kidlangan edi. Eslatib o‘tamiz, kasallik yengil kechayotgan bemorlarga 5-iyuldan boshlab uy sharoitida davolanishga ruxsat berilgan.
Sog‘liqni saqlash vazirligidan qo‘shimcha qilishlaricha, ayni vaqtda davolanayotgan 9 710 nafar bemordan 296 nafarining ahvoli og‘ir, shundan 81 nafarining ahvoli o‘ta og‘ir deb baholanmoqda.
Qayd etish joiz, 27-iyul yakunlariga ko‘ra SSV o‘sha vaqtda davolanayotgan jami 9 414 nafar bemordan 297 nafarining ahvoli og‘ir, 83 nafarining ahvoli o‘ta og‘ir ekanini ma’lum qilgan edi. Shu bilan birga 27-iyul tongida Toshkentda koronavirusga chalingan 35 yoshli homilador ayol vafot etgani aytildi.
Ma’lumot uchun, ahvoli og‘ir va o‘ta og‘ir bemorlarning umumiy soni 16-iyul kuni birinchi marta 60 nafardan, 17-iyul kuni 80 nafardan, 18-iyul kuni 90 nafardan, 19-iyul kuni 100 nafardan 21-iyul kuni 130 nafardan, 23-iyul kuni 140 nafardan, 24-iyul kuni 170 nafardan, 25-iyul kuni 190 nafardan, 26-iyul kuni 200 nafardan oshgandi.
Izoh (0)