Санкт-Петербургдаги ўзбек диаспораси вакили, «Турон» ўзбеклар жамияти президенти Валишер Ҳайдаров пандемияда иш шароитлари ёмонлашгани сабаб мигрантлар Петербургдан қайтиб келишни истаётганини маълум қилди, деб хабар беради «Росбалт».
Таъкидланишича, Ҳайдаровга ўзбекистонлик муҳожирлар доимий равишда иш ҳақи бўйича қарздорлик, сохта фирмалар орқали ишга жойлашиш ҳолатлари тўғрисида шикоятлар билан мурожаат қилмоқда. Шу билан бирга, ҳуқуқни муҳофаза қилиш идораларига мурожаат қилиш ёрдам бермаяпти.
Ҳайдаровнинг сўзларига кўра, бу вазиятда муҳожирларнинг ўзи қисман айбдор, сабаби улар маҳаллий қонунларни билмайди ва «иш берувчига зарур ҳужжатларни» пул олиш умидида имзолайди, аммо бу рўй бермайди, дея таъкидлайди у.
«Ишонинг, бутун бир поездга сиғадиган миқдордаги фуқаролар уйга қайтишни хоҳлаяпти. Иложи бўлганда кетишарди. Бир чартер рейсга 150 га яқин киши рўйхатга олинади, аммо 20-30 нафар олиб кетилади, асосан, кекса одамлар ва болали аёллар. Консуллик ёнида одам тўлиб ётибди», — деди Ҳайдаров.
Унинг фикрича, ўзбекистонликлар орасида норозилик кайфияти кучаймоқда, уларнинг аксарияти умидсизликдан чегарани ноқонуний кесиб ўтишга ҳаракат қилмоқда.
«Улар ватанни соғингани учун уйга қайтишни хоҳлаётгани йўқ. Бу ерда ейишга нарса қолмаган, овқат олиш учун пули ҳам йўқ», — дейди Валишер Ҳайдаров.
Аввалроқ Томскдаги ўзбекистонлик талабалар бош вазир Абдулла Ариповга видеомурожаат йўллаб, уйларига қайтиш учун чартер рейс ташкиллаштириб беришни илтимос қилишган эди. Шундан сўнг, Президент Шавкат Мирзиёевнинг топшириғига биноан Россиянинг Новосибирск шаҳридан 200 га яқин ўзбекистонлик талаба чартер рейс орқали Тошкентга олиб келинган эди.
Кўп ўтмай Қозондаги 400 га яқин ўзбекистонлик талабалар ҳам Ўзбекистон Президентига видеомурожаат йўллаб, ўзлари учун чартер рейс ташкиллаштирилиб берилишини илтимос қилганди.
Изоҳ (0)