O‘zbekiston Respublikasi Tashqi ishlar vaziri Abdulaziz Komilov mamlakatdagi missiyasini yakunlayotgan Yevropa Ittifoqining O‘zbekiston delegatsiyasi rahbari, elchi Eduards Stipraysni qabul qildi. Bu haqda vazirlik axborot xizmati xabar berdi.
Uchrashuv davomida O‘zbekiston va YeI o‘rtasidagi siyosiy, iqtisodiy, madaniy-gumanitar va boshqa sohalardagi hamkorlikning hozirgi holati va istiqbollari to‘g‘risida fikr almashildi.
Bo‘lajak qo‘shma tadbirlar jadvali, jumladan, Toshkent shahrida Markaziy Osiyo mintaqasida mushtaraklikni va barqaror rivojlanishni mustahkamlash bo‘yicha “Yevropa Ittifoqi—Markaziy Osiyo” vazirlar konferensiyasini o‘tkazish masalasi ko‘rib chiqildi.
Savdo-iqtisodiy va investitsion hamkorlikning, iqtisodiyot tarmoqlarini raqamlashtirish, ilm-fan va madaniyat jabhalaridagi hamda ta’lim sohasidagi munosabatlarni mustahkamlashga oid amaliy masalalar yechimiga qaratilgan investitsion loyihalar va dasturlarni amalga oshirishda YeI ishtirokining muhim ahamiyati ta’kidlandi.
Shu bilan birga, 2019-yil yakunlariga ko‘ra 4 milliard AQSh dollarini tashkil etgan o‘zaro savdo aylanmasi hajmlarini yanada oshirishning zarurligi qayd etildi.
Suhbat oxirida vazir YeI delegatsiyasi rahbariga samarali faoliyati hamda O‘zbekiston va Yevroittifoq o‘rtasidagi do‘stona aloqalarni mustahkamlashga qo‘shgan salmoqli hissasi uchun minnatdorchilik izhor etdi.
Ta’kidlanishicha, Eduards Stiprays YeIning O‘zbekistondagi delegatsiyasi rahbari sifatidagi faoliyati davomida ko‘rsatilgan har tomonlama ko‘mak uchun tashakkur bildirdi.
Mavzuga doir:
- O‘zbekistonga turkiyalik mutaxassislar COVID-19‘ga qarshi kurashda maslahatchi sifatida keldi
- Vengriya O‘zbekistonda universitet va bank filiallari ochadi, yadro sohasida hamkorlik qiladi
- O‘zbekiston tashqi ishlar vaziri o‘rinbosari Yevropada xavfsizlik va hamkorlik tashkiloti rahbarlari bilan muzokara o‘tkazdi
Izoh (0)