Бухоро вилоятида пандемия шароитида давлатдан имтиёзли ун харид қилганига қарамасдан истеъмолчилар ҳақига хиёнат қилган ва тарозидан уриб келаётган нон ишлаб чиқарувчилар борлиги маълум бўлди. Бу ҳақда «Дарё»га Бош прокуратураси ҳузуридаги Иқтисодий жиноятларга қарши курашиш департаменти вилоят бошқармаси ахборот хизмати хабар берди.
Бухоро шаҳридаги «Олтин бошоқ» МЧЖ да ўтказилган рейдда корхона сертификатида ҳар бир қолипли нон оғирлиги 500 граммни ташкил этиши алоҳида кўрсатиб қўйилган бўлса-да, ноннинг оғирлиги аслида 475 грамм эканлиги аниқланган. Ўрганилишича, мазкур корхона бир ойда 26 тонна унни арзонлаштирилган нархда сотиб олган.
Худди шунингдек, «Ойбек брусчатки» МЧЖ раҳбарлигидаги нон ишлаб чиқариш цехи ўрганилганда ишлаб чиқаришда санитария қоидаларига эътибор қаратилмагани, тайёрланган хамирнинг очиқ ҳолатидалиги ҳамда ходимларнинг махсус кийим-бошсиз, тозаликка риоя қилмаган ҳолатда фаолият кўрсатаётгани аниқланган. Шунингдек, 600 грамм бўлиши белгиланган нон 450 граммлиги аён бўлган. Ушбу нон корхонаси ҳам 13 тонна унни имтиёзли нархда харид қилгани ойдинлашган.
«Масторум саркор» МЧЖда, Пешку туманидаги «Боғи Мусо ширин нони» корхонасида ҳам истеъмолчилар ҳақига хиёнат қилингани аниқланган.
Пешкудаги «Нон ва мазали ширинликлар» оилавий корхонаси 3 тонна имтиёзли нархдаги ун маҳсулотини қайта ишлаб, кунига 500 донагача нон ишлаб чиқарган ва 450 граммли нонни 1500 сўмдан сотган.
Рейд давомида Олот туманидаги «Комил ташаббус» хусусий корхонаси, Ромитан туманидаги «Ширмой нон» МЧЖларда ҳам худди шундай камчиликларга йўл қўйилаётгани аниқланган. «Вобкент нон ва қандолатлари» хусусий корхонаси ҳар ой 15 тонна унни имтиёзли харид қилиб, сифатли нон ишлаб чиқариб келса-да, тарози палласини шахсий манфаатга «созлаб» қўйилгани аниқланган.
Ғиждувон туманидаги «Муштарийбегим Мафтуна орзуси» МЧЖ имтиёзли тартибда ҳар ой 20 тонна ун олиб, аҳолига ҳар донасининг оғирлиги 350 грамм бўлган нон етказаётгани ошкор бўлган
Иқтисодий жиноятларга қарши курашиш департаменти вилоят бошқармаси масъулига кўра, ўрганишлар якунида ҳар бир хусусий корхона эгаси жиддий огоҳлантирилган. Қонунбузарлик яна такрорланса, уларга нисбатан тегишли қонуний чора кўриш билдирилган.
Таъкидлаш лозимки, Бухоро вилоят ҳокими вазифасини бажарувчи Карим Камолов аҳолига мурожаатида вилоятда нон маҳсулотлари нархи ошишининг олдини олиш мақсадида 532 та корхона 7254 тонна ун маҳсулоти билан таъминлангани, жумладан, 240 та қолипли нон ишлаб чиқарувчи корхонага 2831 тонна, 284 та чакана савдо корхонасига 4386 тонна ва 8 та макарон ишлаб чиқарувчи корхонага эса 37 тонна ун етказилгани ҳақида маълумот берганди.
Изоҳ (0)