Surxondaryo viloyatining Termiz shahri epidemiyaga qarshi kurashish favqulodda komissiyasi yig‘ilishi qaroriga muvofiq, shaharda karantin talablari kuchaytirildi. Bu haqda shahar hokimligi matbuot xizmati xabar berdi.
Unga ko‘ra, 2020-yil 23-iyuldan boshlab noma’lum muddatgacha:
Faoliyat turidan qat’i nazar barcha tadbirkorlik subyektlari, savdo do‘konlari (oziq-ovqat va dori-darmon savdosi bundan mustasno) ko‘ngilochar obyektlar, shu jumladan, tungi klublar, diskoteka, bar, spa va massaj salonlar, karaoke, bilyard zallari, kalyan markazlari, restoranlar, reklama va kompyuter o‘yinlari xizmatini ko‘rsatuvchi tadbirkorlik faoliyati turlari koronavirus kasalligi bilan bog‘liq epidemiologik holat barqarorlashmaguncha to‘xtatildi.
Shuningdek, quyidagilar ko‘zda tutilgan:
- Karantin vaqtida hududlarda maqsadsiz va tegishli ruxsatnomasiz harakatlanayotgan avtomobillar ustidan hamda aholining zarur bo‘lmagan hollarda ko‘chaga chiqishi bo‘yicha nazorat o‘rnatish;
- shaharning kirish-chiqish, asosiy va ichki ko‘chalarida blok postlarni kuchaytirilgan rejimga o‘tkazish;
- avtotransport vositalari kirishi hamda yo‘nalishsiz taksilar harakati to‘liq to‘xtatilishi;
- shaharda aholining gavjum bo‘lib yurishini qatiy cheklash.
Bunda faqatgina hayotiy zarur ehtiyojlar oziq-ovqat, dori-darmon, tibbiy buyum va vositalar xarid qilish, shifokor ko‘rigiga murojaat etish, shuningdek, ish joyiga borish va kelish uchungina ruxsat etiladi. Maxsus ruxsatnoma (stiker)lari va “yetkazib berish” xizmati mavjud bo‘lgan avtotransportlari harakatlanishi mumkin.
Belgilangan karantin talablari bo‘yicha shahardagi korxona, tashkilot va muassasalar, xo‘jalik birlashmalari 25—26-iyul kunlari xodimlarni ishga jalb etmaslik, xodimlarning ushbu kunlari uyda qolishi uchun barcha zarur shart-sharoitlar yaratish talab etiladi.
Ma’lumot uchun, Surxondaryo viloyatida 23-iyul soat 17:00 holatiga ko‘ra, koronavirusga chalinganlar soni 427 nafarga yetdi. Ushbu holatlarning 134 tasi 22 va 23-iyul kunlariga to‘g‘ri keldi. Hozirgacha kasallangan 427 kishidan 175 nafari (41 foiz) sog‘aygan, 6 bemor vafot etgan. Viloyat hokimi To‘ra Bobolov ham koronavirusga chalingan. Uning kasallangani bir necha kun yashirildi. Ayni paytda u Toshkent shahrida kasallikdan davolanmoqda, ahvoli barqaror.
Izoh (0)