O‘zbekistonda 1-avgustdan boshlab yana qator soliq imtiyozlari bekor qilinadi

O‘zbekiston Prezidentining 8-iyuldagi PF-6021-son farmoni bilan mamlakatda yana qator soliq imtiyozlari bekor qilinadi, deb xabar beradi Norma.

Xususan, 2020-yil 1-avgustdan boshlab:

birinchidan, Dasturiy mahsulotlar va axborot texnologiyalari texnologik parki (Texnopark) rezidentlari dividendlarni chet el valyutasida to‘lash huquqidan mahrum etiladi. Eslatib o‘tamiz, mazkur preferensiya 2019-yil dekabrda tugatilgan Mirzo Ulugbek Innovation Center rezidentlariga taqdim etilgan, keyinroq Texnopark rezidentlariga nisbatan tatbiq etilgan edi;

ikkinchidan, chetdan jalb etiladigan xorijiy mutaxassislarga chet el valyutasida haq to‘laydigan tashkilotlar mablag‘larni ularning xorijdagi hisobvaraqlariga o‘tkazishlari kerak. Eslatib o‘tamiz, Prezidentning turli qarorlari bilan quyidagilarga ana shunday huquq berilgan:

• kompaniyalar – LG CNS Uzbekistan QK, “O‘zbekgidroenergo” AJ, “ ‘Paxtakor’ futbol klubi” MChJ va “O‘zbekiston tarixi” telekanaliga;
• ilmiy-ma’rifiy tashkilotlar – mamlakat oliy ta’lim muassasalari, pedagog kadrlarni qayta tayyorlash va malakasini oshirish bo‘yicha soha markazlari, O‘zbekiston—Yaponiya yoshlar innovatsiya markazi va O‘quv-amaliy to‘qimachilik texnoparkiga;
• davlat muassasalari – Axborot kommunikatsiyalari vazirligi, Adliya vazirligi, Iqtisodiy taraqqiyot va kambag‘allikni qisqartirish vazirligi, Energetika vazirligi, Transport vazirligi, Investitsiyalar va tashqi savdo vazirligi, Qishloq xo‘jaligi vazirligi, Davlat veterinariya qo‘mitasi, Intellektual mulk agentligi, “O‘zstandart” va “Raqamli ishonch” jamg‘armasiga.

uchinchidan, mijozlarning talabnomalari bo‘yicha banklar tomonidan sotib olingan va 15 ish kuni mobaynida foydalanilmagan xorijiy valyutani so‘zsiz qayta sotish haqidagi talab bekor qilinadi;

to‘rtinchidan, quyidagi soliq imtiyozlari bekor qilinadi:

a) 2009-yil 28-iyuldagi PQ-1166-son qarorda nazarda tutilgan quyidagi muddatga ozod qilish shaklidagi:

• 5 yil muddatga – yuridik shaxslar tijorat banklarining depozitlariga va qimmatli qarz qog‘ozlariga 1 yildan ortiq muddatga joylashtirishdan olinadigan foizli daromadlari bo‘yicha soliqqa tortishdan;
• 3 yil muddatga – lizing xizmatlari ko‘rsatuvchi yuridik shaxslar foyda solig‘i va lizing operatsiyalaridan tushadigan daromadlar bo‘yicha aylanmadan olinadigan soliqni to‘lashdan;

beshinchidan, 2017-yil 3-noyabrdagi PQ-3351-son va 2019-yil 30-maydagi PQ-4348-son qarorlardan eksport va import operatsiyalari doirasidagi alohida muddatlar chiqarib tashlanmoqda. Shu tufayli yangi Tashqi savdo operatsiyalari amalga oshirilishi monitoringini olib borish va nazorat qilish tartibi to‘g‘risidagi nizom bilan yuzaga keladigan ehtimoliy ziddiyatlar bartaraf etiladi.

Hujjat qonun hujjatlari ma’lumotlari milliy bazasida e’lon qilingan.

Avvalroq Monopoliyaga qarshi kurashish qo‘mitasi “O‘zmetkombinat”ning qora metallarni, “O‘zikkilamchiranglimetall”ning rangli metallarni, “Davlatbelgisi”ning turli xil qog‘oz mahsulotlarini ishlab chiqarishidagi monopol holati va eksklyuziv huquqlari, “O‘zstandart” agentligiga tegishli o‘lchov vositalarini tekshirish va shtrix-kodlarni berish bo‘yicha korxonalari kabi monopoliyalarni bekor qilishni taklif etgandi.