Сурхондарё вилоятининг Термиз шаҳри эпидемияга қарши курашиш фавқулодда комиссияси йиғилиши қарорига мувофиқ, шаҳарда карантин талаблари кучайтирилди. Бу ҳақда шаҳар ҳокимлиги матбуот хизмати хабар берди.
Унга кўра, 2020 йил 23 июлдан бошлаб номаълум муддатгача:
Фаолият туридан қатъи назар барча тадбиркорлик субъектлари, савдо дўконлари (озиқ-овқат ва дори-дармон савдоси бундан мустасно) кўнгилочар объектлар, шу жумладан, тунги клублар, дискотека, бар, спа ва массаж салонлар, караоке, билярд заллари, калян марказлари, ресторанлар, реклама ва компьютер ўйинлари хизматини кўрсатувчи тадбиркорлик фаолияти турлари коронавирус касаллиги билан боғлиқ эпидемиологик ҳолат барқарорлашмагунча тўхтатилди.
Шунингдек, қуйидагилар кўзда тутилган:
- Карантин вақтида ҳудудларда мақсадсиз ва тегишли рухсатномасиз ҳаракатланаётган автомобиллар устидан ҳамда аҳолининг зарур бўлмаган ҳолларда кўчага чиқиши бўйича назорат ўрнатиш;
- шаҳарнинг кириш-чиқиш, асосий ва ички кўчаларида блок постларни кучайтирилган режимга ўтказиш;
- автотранспорт воситалари кириши ҳамда йўналишсиз таксилар ҳаракати тўлиқ тўхтатилиши;
- шаҳарда аҳолининг гавжум бўлиб юришини қатий чеклаш.
Бунда фақатгина ҳаётий зарур эҳтиёжлар озиқ-овқат, дори-дармон, тиббий буюм ва воситалар харид қилиш, шифокор кўригига мурожаат этиш, шунингдек, иш жойига бориш ва келиш учунгина рухсат этилади. Махсус рухсатнома (стикер)лари ва «етказиб бериш» хизмати мавжуд бўлган автотранспортлари ҳаракатланиши мумкин.
Белгиланган карантин талаблари бўйича шаҳардаги корхона, ташкилот ва муассасалар, хўжалик бирлашмалари 25—26 июль кунлари ходимларни ишга жалб этмаслик, ходимларнинг ушбу кунлари уйда қолиши учун барча зарур шарт-шароитлар яратиш талаб этилади.
Маълумот учун, Сурхондарё вилоятида 23 июль соат 17:00 ҳолатига кўра, коронавирусга чалинганлар сони 427 нафарга етди. Ушбу ҳолатларнинг 134 таси 22 ва 23 июль кунларига тўғри келди. Ҳозиргача касалланган 427 кишидан 175 нафари (41 фоиз) соғайган, 6 бемор вафот этган. Вилоят ҳокими Тўра Боболов ҳам коронавирусга чалинган. Унинг касаллангани бир неча кун яширилди. Айни пайтда у Тошкент шаҳрида касалликдан даволанмоқда, аҳволи барқарор.
Изоҳ (0)