Turkiya chempionatining 33-tur uchrashuvi doirasida 19-iyul, yakshanba kuni “Trabzonspor” klubi “Konyaspor”ga 3:4 hisobida mag‘lub bo‘ldi va birinchi o‘rinda borayotgan “Istanbul Bashakshehir”ga yetib olish imkoniyatidan mahrum bo‘ldi.
Shu tariqa “Istanbul Bashakshehir” (69) eng yaqin ta’qibchisini 7 ochkoga ortda qoldirgan holda musobaqa yakunlanishiga bir tur qolganida mamlakat chempionligini qo‘lga kiritdi. Uchinchi o‘rinni esa “Sivasspor” (60) egallab turibdi.
Bu Istanbul klubi tarixidagi ilk chempionlik bo‘ldi. Ilgari klubi ikki bor kumush medallar bilan taqdirlangan. Yana bir e’tiborga molik jihati shundaki, so‘nggi 10 yil ichida ilk marta “Fenerbahche”, “Beshiktosh” yoki “Galatasaroy” klublari Turkiya chempionligini qo‘lga kiritmadi.
Qayd etish joiz, “Istanbul”da bir qator mashhur futbolchilar to‘p suradi. Robinyo, Martin Shkrtel, Gael Klishi, Eljero Elia, Demba Ba, Aleksandr Epuryanu shular jumlasidandir. Jamoani esa Turkiya milliy terma jamoasining sobiq o‘yinchisi Okan Buruk boshqaradi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)