AQShda 11 yoshli bola sinfdoshlariga “negr” so‘zini ishlatish ruxsatini sotib, 1000 dollar ishlab topdi

AQShda 11 yoshli qora tanli o‘smir maktabdagi o‘zining tanishlariga “negr” so‘zidan foydalanish huquqini sotishni boshladi, deb xabar beradi Slate.

Yigitchaning o‘gay onasining so‘zlariga ko‘ra, u turmush o‘rtog‘i bilan 11 yil oldin qora tanli opa-uka  Martin va Teylorni tarbiyalashni boshlagan. Er-xotin oq tanli bo‘lganligi sabab ular bolalarni tarbiyalashda irqiy masalalarga alohida e’tibor qaratib kelgan. “Kechagi kunga qadar mazkur yo‘nalishda yaxshi tarbiya berganman deb o‘ylardim”, — deydi ayol.

Keyinroq ayolning qizi Teylor onasiga Martin maktabdagi bolalarga “negr” so‘zidan foydalanish huquqini 20-30 dollardan sotgani tasvirlangan skrinshotlarni ko‘rsatgan. Teylor bu haqda do‘stining singlisidan shu kabi “taklif” tushganidan so‘ng xabar topgan.

Bu kabi holat bir necha hafta davom etgan va yigitcha qariyb 1000 dollar ishlab topishga ulgurgan. Martinning tengdoshlari pulni unga Venmo orqali (PayPal’ga tegishli mobil to‘lov servisi) to‘lagan.

“Turmush o‘rtog‘im bilan g‘azabdamiz va nima qilishga ham hayronmiz. Martinning ushbu ishi qora tanli sinfdoshlarini xafa qilgan ko‘rinadi, men ona va inson sifatida o‘zimni juda yomon his qilyapman… hozirda uning barcha qurilmalari va pullarini uzoq vaqtga olib qo‘yish haqida o‘ylayapman. Nima qilishimiz kerak? Bunga qarshi qancha chora qo‘llashimiz, boshqa ota-onalardan qanday kechirim so‘rashimiz kerak?”, — deb yozadi ayol.

Slate nashri muharrirlari ayolga yoshi katta qora tanli insonlardan masalahat olishni tavsiya qilgan.

“Martin ayrim sinfdoshlari bu o‘yinni o‘ynagan bo‘lsa ham, ‘ruxsat’ni sotib olgan biror bola ushbu so‘zni ishlatish uchun aslida hech qanday ruxsatni kutmaganini tushunishi kerak”, — deydi nashr muharrirlari.

Eslatib o‘tamiz,  2016-yilda AQSh prezidenti Barak Obama imzolagan yangi qonun loyihasiga muvofiq, federal qonunchilikdan “negr” (negro) va “Sharq odami” (oriental) singari tushunchalar chiqarib tashlangan.

Ma’lumot uchun, “negr” tushunchasi AQShda quldorlik davrida keng qo‘llanilgan. Quldorlik 1865-yilda bekor qilingan. XX asrda ushbu atama haqorat sifatida baholanib, rasmiy muomaladan chiqarilgan. Hozir ba’zida faqat so‘zlashuv tilida qo‘llanib keladi.