АҚШда 11 ёшли бола синфдошларига «негр» сўзини ишлатиш рухсатини сотиб, 1000 доллар ишлаб топди

АҚШда 11 ёшли қора танли ўсмир мактабдаги ўзининг танишларига «негр» сўзидан фойдаланиш ҳуқуқини сотишни бошлади, деб хабар беради Slate.

Йигитчанинг ўгай онасининг сўзларига кўра, у турмуш ўртоғи билан 11 йил олдин қора танли опа-ука  Мартин ва Тэйлорни тарбиялашни бошлаган. Эр-хотин оқ танли бўлганлиги сабаб улар болаларни тарбиялашда ирқий масалаларга алоҳида эътибор қаратиб келган. «Кечаги кунга қадар мазкур йўналишда яхши тарбия берганман деб ўйлардим», — дейди аёл.

Кейинроқ аёлнинг қизи Тэйлор онасига Мартин мактабдаги болаларга «негр» сўзидан фойдаланиш ҳуқуқини 20-30 доллардан сотгани тасвирланган скриншотларни кўрсатган. Тэйлор бу ҳақда дўстининг синглисидан шу каби «таклиф» тушганидан сўнг хабар топган.

Бу каби ҳолат бир неча ҳафта давом этган ва йигитча қарийб 1000 доллар ишлаб топишга улгурган. Мартиннинг тенгдошлари пулни унга Venmo орқали (Paypal’га тегишли мобил тўлов сервиси) тўлаган.

«Турмуш ўртоғим билан ғазабдамиз ва нима қилишга ҳам ҳайронмиз. Мартиннинг ушбу иши қора танли синфдошларини хафа қилган кўринади, мен она ва инсон сифатида ўзимни жуда ёмон ҳис қиляпман… ҳозирда унинг барча қурилмалари ва пулларини узоқ вақтга олиб қўйиш ҳақида ўйлаяпман. Нима қилишимиз керак? Бунга қарши қанча чора қўллашимиз, бошқа ота-оналардан қандай кечирим сўрашимиз керак?», — деб ёзади аёл.

Slate нашри муҳаррирлари аёлга ёши катта қора танли инсонлардан масалаҳат олишни тавсия қилган.

«Мартин айрим синфдошлари бу ўйинни ўйнаган бўлса ҳам, ‘рухсат’ни сотиб олган бирор бола ушбу сўзни ишлатиш учун аслида ҳеч қандай рухсатни кутмаганини тушуниши керак», — дейди нашр муҳаррирлари.

Эслатиб ўтамиз,  2016 йилда АҚШ президенти Барак Обама имзолаган янги қонун лойиҳасига мувофиқ, федерал қонунчиликдан «негр» (negro) ва «Шарқ одами» (oriental) сингари тушунчалар чиқариб ташланган.

Маълумот учун, «негр» тушунчаси АҚШда қулдорлик даврида кенг қўлланилган. Қулдорлик 1865 йилда бекор қилинган. ХХ асрда ушбу атама ҳақорат сифатида баҳоланиб, расмий муомаладан чиқарилган. Ҳозир баъзида фақат сўзлашув тилида қўлланиб келади.