Namangan viloyat yuqumli kasalliklar shifoxonasida koronavirus infeksiyasidan butunlay tuzalgan 55 nafar bemor 18-iyul, shanba kuni uyiga kuzatildi. Bu haqda “Daryo” muxbiri Azizbek Abduvaliyev xabar bermoqda.
Ular orasida Namangan shahri, Chortoq, Uychi, Uchqo‘rg‘on, Yangiqo‘rg‘on, Pop, To‘raqo‘rg‘on va Chust tumanlarida yashovchi fuqarolar bor.
Shuningdek, Buxoro viloyatidan kelgan 3 nafar bemor ham kasalxonani tark etdi.
Tuzalganlarni yashash manzillariga jo‘natish uchun 6 ta avtobus ajratilgan. Ular hozirda uylariga eson-omon yetkazilgani aytilmoqda.
Shu tariqa, Namangan viloyatida koronavirusdan xalos bo‘lgan bemorlar soni 385 kishiga yetdi. Kasalxonalarda 128 nafar bemor qolmoqda.
Eslatib o‘tamiz, O‘zbekistonda 18-iyul soat 17:00 holatiga ko‘ra, 172 kishida koronavirus aniqlangandi. 18-iyulning o‘zida 461 kishida virus qayd etildi.
Ayni paytda O‘zbekistonda 9003 nafar koronavirus infeksiyasiga chalingan fuqaro sog‘aygan. Davolanish ko‘rsatkichi 56 foizga teng bo‘lib turibdi.
Sog‘liqni saqlash vazirligi hisobi bo‘yicha mamlakatda 83 ta o‘lim holati qayd etilgan. “Daryo” hisobi bo‘yicha yana 2 kishi — Davlat xizmatlari agentligining Navoiy viloyati filiali xodimi va Madaniyat vazirligi xodimi kasallik qurboni bo‘lgan.
Izoh (0)