O‘zbekistondagi ba’zi maktablar xodimlaridan karantin choralari davom etayotgan hozirgi paytda haq to‘lanmaydigan mehnat ta’tiliga chiqish bo‘yicha ariza yozish, shuningdek, noma’lum muddatgacha maoshlarining yarmidan ixtiyoriy tarzda voz kechish so‘ralmoqda. Bu haqda “Kun.uz” xabar berdi.
Xalq ta’limi vazirligi matbuot kotibi Laylo Rustamovaning ta’kidlashicha, xodimning asosiy yillik mehnat ta’tili tugagach, unga belgilangan tartibda maosh to‘lanishi kerak.
Ma’lum qilinishicha, Moliya vazirligi hamda Bandlik va mehnat munosabatlari vazirligining 2020-yil 4-maydagi qo‘shma xatiga asosan, karantin munosabati bilan tashkilotning ish faoliyati to‘liq yoki qisman to‘xtatilishi sababli, shuningdek, xodimning lavozim majburiyatlarining xususiyatlariga yoki boshqa sabablarga ko‘ra o‘z vazifasini masofaviy ish rejimida, moslashuvchan ish grafigida yoki uyda ishlashga o‘tkazish imkoni bo‘lmagan hollarda unga asosiy lavozim maoshidan kam bo‘lmagan miqdorda ish haqi to‘lanishini ta’minlash belgilangan.
“Shunga ko‘ra, karantin davrida xodimlarning asosiy yillik mehnat ta’tili davri tugagandan so‘ng ularga qo‘shma xatda ko‘rsatilgan tartibda ish haqi to‘lovlari amalga oshiriladi”, — deya ma’lum qilgan vazirlik vakili.
Yuqoridagi qo‘shma xatda karantinga oid choralar amal qilish davrida budjet tashkilotlari xodimlarini hatto masofaviy ish rejimida, moslashuvchan ish grafigida yoki uyda ishlashga o‘tkazish imkoniyati bo‘lmagan hollarda ham ish haqi saqlanmagan holda mehnat ta’tiliga yubormaslik hamda ushbu masala bo‘yicha avval qabul qilingan buyruqlarni qayta ko‘rib chiqish tavsiya etiladi.
Eslatib o‘tamiz, O‘zbekistonda 10-iyuldan boshlab karantin cheklovlarining kuchaytirilishi sababli davlat organlari va tashkilotlarining asosiy ish faoliyatiga ta’sir etmagan holda xodimlarining qonunchilikda belgilangan tartibda mehnat ta’tiliga chiqarilishi, qolgan qismining mehnat faoliyatining maksimal darajada masofadan tashkil etilishi belgilangan.
Mavzuga doir:
Izoh (0)