“Real” darvozaboni Tibo Kurtua Ispaniya chempionligini qo‘lga kiritib, tarixiy natija qayd etdi.
Gap shundaki, 28 yoshli belgiyalik posbon Ispaniya chempionati tarixida Madridning ikki klubi safida chempion bo‘lgan ikkinchi o‘yinchiga aylandi. Bundan avval Xose Luis Peres-Paya ushbu natijani qayd etgandi. U 1951-yilda “Atletiko”, 1954 va 1955-yillarda esa “Real” safida ushbu musobaqada g‘olib chiqqan.
Avvalroq Kurtua “quruq” o‘yinlar o‘tkazish bo‘yicha ham “Real”ning 32 yillik rekordini yangilagandi.
Kurtua 2018-yilning avgustidan beri “qirollik klubi” sharafini himoya qilib keladi. U “Real” safida umumiy hisobda 75 ta o‘yin o‘tkazib, shularning 31 tasida o‘z darvozasi daxlsizligini saqlab qolgan. Uning klub bilan shartnomasi 2024-yilning iyun oyigacha amal qiladi.
“Real” 37-turda “Vilyarreal”ni 2:1 hisobida mag‘lub etib, musobaqa yakunlanishiga 1 tur qolganida chempionlikni qo‘lga kiritdi. Bu Madrid klubi uchun 34-chempionlik bo‘ldi. So‘nggi bor “qaymoqranglilar” La Liganing 2016/2017-yilgi mavsumida g‘olib bo‘lgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)