Toshkent shahar Chilonzor tumanida yashovchi 53 yoshli erkak koronavirusga chalinib, o‘tkir yurak-qon tomir va nafas yetishmovchiligidan vafot etdi. Bu haqda Sog‘liqni saqlash vazirligi xabar berdi.
Ma’lum qilinishicha, Chilonzor tumanida yashovchi 53 yoshli fuqaro Sh.A. 6-iyul kuni holsizlik, tana haroratining ko‘tarilishi, yo‘tal, bosh og‘rig‘i, hansirash paydo bo‘lgach, Yakkasaroy tuman tibbiyot birlashmasiga murojaat qilgan va bemorda COVID-19 tasdiqlangan. Shundan so‘ng u Virusologiya ilmiy-tekshirish instituti klinikasida davolanishni boshlagan.
Bemorga COVID-19 infeksiyasi o‘ta og‘ir kechishi, ikki tomonlama pnevmoniya tashxisi qo‘yilgan. Mutaxassislar tomonidan onlayn konsultatsiya va konsiliumlar o‘tkazilgan, davolash jarayoni mutaxassislar tavsiyasi asosida olib borilgan.
Bemorda, shuningdek, yurak ishemik kasalligi, qandli diabetning 2-turi, semizlikning 2—3-darajasi borligi ham qayd etilgan.
So‘nggi kunlarda bemorning ahvoli yomonlashgan, zudlik bilan o‘pka, yurak reanimatsiyasi amalga oshirilgan. O‘tkazilgan muolajaga qaramasdan, yurak ritmi tiklanmagan va bemor o‘tkir yurak-qon tomir hamda nafas yetishmovchiligidan vafot etgan.
Mazkur bemorning vafoti O‘zbekistonda koronavirus oqibatida yuzaga kelgan va Sog‘liqni saqlash vazirligi tomonidan rasman tasdiqlangan 73-o‘lim holati bo‘ldi. Shu bilan birga, Toshkent shahar Sergeli tumani bo‘yicha IIO FMB podpolkovnigi va Davlat xizmatlari agentligining bir xodimi ham koronavirusdan vafot etgan, biroq Sog‘liqni saqlash vazirligi hozircha mazkur ikkita o‘lim bo‘yicha rasmiy ma’lumot bergani yo‘q.
Avvalroq, 13 va 14-iyul kunlari Toshkent shahar IIBB mayori va IIV podpolkovnigi koronavirus infeksiyasi asoratlari oqibatida vafot etgani ma’lum bo‘lgan, keyinroq ushbu o‘lim holatlari Sog‘liqni saqlash vazirligi tomonidan tasdiqlangan edi.
Izoh (0)