Тошкентнинг 11 та туманида аҳоли зич яшайдиган ҳамда деҳқон бозорларидан узоқда жойлашган 50 та маҳалласида фермерларга мулк қилиб бериладиган «яшил бозор» дала дўконларини ташкил этиш чоралари кўрилмоқда. Бу ҳақда Бош прокуратура ҳузурида Иқтисодий жиноятларга қарши кураш департаменти бўлим бошлиғи Фарҳод Очилов маълум қилди.
Натижада айни маҳаллалардаги 243 мингдан ортиқ фуқаро маҳсулотларни «даладан дастурхонга» тамойили асосида сотиб олиш имконига эга бўлади.«Даладан дастурхонга» тамойилини татбиқ этиш мақсадида «яшил бозор» дала дўконларини Бухоро, Жиззах, Навоий, Самарқанд, Сурхондарё ва Қашқадарё вилоятларининг марказларида ҳам барпо этиш бўйича чора-тадбирлар кўрилаётгани айтилди.
Очилов деҳқон ўз маҳсулотини ўртакашларсиз истеъмолчига етказишига асосланган тамойилни жорий этишда 2 та жиддий муаммога дуч келинганини алоҳида таъкидлади. Биринчиси, деҳқонлар онгида «деҳқон–бу фақатгина маҳсулот етиштирувчи ва ўртакашга сотувчи бўғин», деган стереотип ўрнашиб қолганлиги, иккинчиси, деҳқонлар бюрократик ва жиноий элементлар сабаб бозорга кира олмаганлигида, уларда тадбиркорлик ўзагининг шаклланмаганлиги. Муаммоларни зудлик билан бартараф қилиш мақсадида ўртакашлар бўғинини истисно қилиш талаб этилган.
Эндиликда департамент томонидан улгуржи бозорларда олибсотарлар қўлида сарсон бўлаётган деҳқонларга истаган бозорида, тўғридан-тўғри, юк машинасидан маҳсулотини сотишига шароит яратиб берилгани билдирилди. Аввал деҳқон етиштирган маҳсулотини ўртакашга 800 сўмга сотиб, бу маҳсулот устама билан истеъмолчига 2 000 сўмга етиб борган бўлса, энди деҳқон уни 1 200 сўмдан сотиб, ўзи ҳам даромад қилади, аҳоли ҳам арзон нархда сотиб олмоқда.Механизм доирасида Тошкент шаҳридаги 13 та деҳқон бозорида деҳқонларга 70 та музлаткич, 615 та савдо растаси, 700 дан ортиқ тарози ва бошқа воситалар беғараз ажратиб берилиши таъминланган.
Изоҳ (0)