Навоий вилояти ҳокими коронавирус масаласида аҳолига мурожаат қилиб, ҳудуддаги вазият ҳақида маълумот берди

Навоий вилояти ҳокими Қобил Турсунов коронавирус билан боғлиқ вазият юзасидан йвилоят аҳолисига мурожаат қилди. Шунингдек, ҳоким ижтимоий тармоқлар орқали коронавирус масаласида берилган саволларга жавоб берди. Бу ҳақда «Kun.uz» хабар қилди.

Қобир Турсуновнинг маълум қилишича, бугунги кунда вилоятда қарийб 1 миллион нафар аҳолига 166 та даволаш профилактика ва ёрдамчи муассаса тиббий хизмат кўрсатмоқда. Хусусий секторда 184 та тиббиёт муассасаси фаолият кўрсатмоқда.

Вилоятда шу вақтга қадар 362 кишида коронавирус инфекцияси тасдиқланган бўлиб, 16 июль кунигача улардан 310 нафари тўлиқ тузалган. 52 нафар бемор эса вилоятдаги 5 та тиббиёт муассасасида даволанмоқда.

Айни пайтда вилоятда 1240 киши уй шароитида карантинга олинган ва 60 нафарга яқин фуқаро бирламчи аниқланган бемор сифатида уй шароитида даволанмоқда. Вилоятда 3 нафар ўта оғир аҳволдаги бемор касаллик оқибатида вафот этган.

Ҳокимнинг маълум қилишича, вирус тарқалишининг олдини олиш ҳамда касалланишларни ўз вақтида аниқлаш мақсадида 5 июлдан бошлаб вилоятда Германияда ишлаб чиқарилган тест диагностикумлари фаолияти йўлга қўйилган.

Вилоятнинг барча шаҳар ва туманлар СЭОМларида кунига ўртача 1200 дан 1500 тагача тест учун намуна олиш имконияти мавжуд.

Вилоят Соғлиқни сақлаш бошқармаси ҳузурида 5 июлдан бошлаб Call-марказ фаолияти қайтадан ташкил этилди. Марказ билан +998 (79) 220-47-65 рақами орқали боғланиш мумкин.

Қобил Турсуновнинг билдиришича, ўтган 4 ой давомида вилоят миқёсида карантин қоидаларини бузган 8711 нафар фуқарога нисбатан маъмурий баённомалар тузилиб, жарима қўлланилган. Бунда энг кўп жарима Навоий шаҳрида — 1934 нафар, сўнгра Зарафшон шаҳрида — 1513 нафар фуқарога нисбатан қўлланилган.

Эслатиб ўтамиз, Президент Шавкат Мирзиёев 8 июль куни бўлиб ўтган видеоселекторда мамлакатдаги коронавирус билан боғлиқ вазиятга тўхталиб, вилоят раҳбарларига аҳолига мурожаат қилиш бўйича топшириқ берганди.

Шавкат Мирзиёев 14 июль куни ўтказилган видеоселекторда ҳокимларга эрталаб соат 08:00 дан 09:00 гача ва кечқурун соат 21:00 дан 22:00 гача ижтимоий тармоқларда кўтарилган саволларга жавоб бериш вазифасини қўйган.