Bosh vazir o‘rinbosari — investitsiyalar va tashqi savdo vaziri Sardor Umurzoqov 13-iyul kuni videokonferensaloqa orqali Osiyo taraqqiyot banki (OTB) prezidenti Masatsugu Asakava bilan muzokaralar o‘tkazdi. Bu haqda investitsiyalar va tashqi savdo vazirligi axborot xizmati xabar qilgan.
Muloqot O‘zbekiston hukumati tomonidan aholini koronavirus tarqalishidan himoya qilish va pandemiyaning mamlakat ijtimoiy-iqtisodiy rivojlanishiga salbiy ta’sirini minimallashtirish bo‘yicha ko‘rilayotgan choralar doirasidagi hamkorlikni muhokama qilishga bag‘ishlandi.
Suhbatda Masatsugu Asakava O‘zbekistonda sog‘liqni saqlash tizimining sifatli va uzluksiz ishlashini ta’minlash, maxsus tibbiy muassasalar va karantin zonalarini tashkil etish, aholiga tibbiy va moddiy yordam ko‘rsatish, makroiqtisodiy barqarorlikni saqlash va pandemiya sharoitida tashqi iqtisodiy faoliyatni rag‘batlantirish bo‘yicha ko‘rilayotgan chora-tadbirlarni to‘liq qo‘llab-quvvatladi.
Shuningdek, Bank rahbariyati ustuvor yo‘nalishlar bo‘yicha O‘zbekistonga kelgusida yordam ko‘rsatishga sodiqligini bildirdi. Xususan, koronavirus tarqalishiga qarshi kurashish, shuningdek, Sirdaryo viloyatining shikastlangan infratuzilmasini tiklashga qaratilgan choralarni moliyalashtirish davom ettiriladi.
OTB prezidenti O‘zbekiston sog‘liqni saqlash tizimi va sanitariya-epidemiologiya xizmatini modernizatsiya qilish va jihozlash uchun 100 million AQSh dollari miqdorida yangi kreditni ma’qullash bo‘yicha tayyorgarlik ishlari yakunlanayotganigini ma’lum qildi. Kredit 2020-yilning avgust oyi boshida ma’qullanishi kutilmoqda. Shuningdek, ushbu loyihani amalga oshirish uchun birgalikda moliyalashtirish asosida Osiyo infratuzilmaviy investitsiyalar bankining 100 million dollarlik mablag‘lari jalb etilishi ma’lum qilindi.
“Tomonlar qishloq xo‘jaligi, suv resurslarini boshqarish, sog‘liqni saqlash, ta’lim, energetika, infratuzilmaviy qurilish va xususiy sektorni rivojlantirish sohalaridagi qo‘shma loyihalarning joriy holatini hamda ularni amalga oshirishni tezlashtirish mexanizmlarini alohida muhokama qildi”, — deyiladi xabarda.
Muzokaralar yakunida OTB bilan amaldagi Hamkorlik dasturi doirasidagi faol hamkorlikni davom ettirish va 2021—2023-yillarga mo‘ljallangan yangi dastur bo‘yicha kelishish ishlarini boshlashga qaror qilindi.
Eslatib o‘tamiz, iyun oxirida OTB O‘zbekistonga COVID-19 pandemiyasi davrida iqtisodiyotni qo‘llab-quvvatlash uchun 500 million dollar miqdorida kredit berishni ma’qullagandi. Kredit kelishuvi ham imzolangan. Shuningdek, 13-iyulda O‘zbekiston hukumati va Jahon banki mamlakat qishloq xo‘jaligini modernizatsiya qilish loyihasini amalga oshirish uchun umumiy qiymati 500 million dollarlik qarz bitimini imzolagan.
Izoh (0)