Тожикистон—Ўзбекистон чегарасидаги «Ойбек» назорат-ўтказиш пунтида 200-250 та юк машинаси иштирокида тирбандлик юзага келди. Юк машиналари ҳайдовчилар COVID-19’га топширган тест натижаларини бир неча кун кутишга тўғри келаётгани сабаб тўхтаб қолган. Бу ҳақда чегара постида қолиб кетган ҳайдовчилардан бирига таяниб, «Fergana.ru» хабар берди.
Таъкидланишича, кунлик овқатланиш учун 100 минг сўм кетмоқда, бир ҳафта ва ундан ортиқ вақтдан бери назорат-ўтказиш пунктида қолиб кетганларнинг пуллари тугамоқда. Шунингдек, ҳайдовчилар иссиқ об-ҳаво шароитида қизиб кетадиган юк машинаси кабинасида яшашга мажбур бўляпти. Автотураргоҳда жой йўқлиги сабаб машиналар трасса бўйига қатор қилиб қўйилмоқда. Чегара яқинидаги туманда ўзбек, тожик, рус, қирғиз, турк автомобиль рақамларига эга «фуралар»ни кўриш мумкин.
Бироқ «имтиёзга эга» юк машиналари ҳам мавжуд. Ҳайдовчининг сўзларига кўра, Tashkent City лойиҳаси учун қурилиш материллари олиб кетаётган юк машиналари ва «цементовоз»лар чегарадан тезда ўтиб кетмоқда. Қолганлар эса тиббиёт ходимлари натижасини қачон беришларини кутишга мажбур. Тожикистонга қайтиб кетишни истаган айрим ҳайдовчилар ҳам COVID-19 «справкаси»сиз ортга қўйилмаган.
Нашр манбасининг сўзларига кўра, у назорат-ўтказиш пунктига 10 июль куни келган ва кечаси коронавирусга тест топширган. Таҳлил натижалари ҳамон йўқ. Санитария-эпидемиологик хизмати ходимларига мурожаат қилинган, бироқ улар жавоблар қачон чиқиши ҳақида ҳеч нарса демаган.
Ҳайдовчининг қўшимча қилишича, уч кун давомида тиббиёт ходимларидан ҳеч қандай дарак бўлмаган ва фақат бугун 4-5 кун олдин тест топширганларнинг 30 тасини натижасини олиб келган. Улар орасида коронавирус қайд этилганлар ҳам бор. «Биз ниқобдамиз, оралиқ масофага риоя қилишга уриняпмиз. Аммо барибир машиналар тўплангач, ҳайдовчилар мулоқотда бўлади, бир-бири билан гаплашади. Касаллик юқтириб олишдан хавотирдамиз», — дейди ҳайдовчи.
Унинг айтишича, барча чегараларда карантин зоналари мавжуд. Бироқ авваллари таҳлил натижалари 12 соат ёки узоғи билан бир суткада тайёр бўлган. Июль ойидан бошлаб эса вазият ўзгарган ва натижалар жуда секин келмоқда.
Эслатиб ўтамиз, март ойида Эрон—Туркманистон чегарасида қолиб кетган 11 ўзбекистонлик юк машина ҳайдовчиси Шавкат Мирзиёевдан ёрдам сўраган эди. Шундан сўнг, Президент уларни Ўзбекистонга қайтариш бўйича алоҳида кўрсатма берганди.
Изоҳ (0)