“Davyergeodezkadastr” qo‘mitasi tizimida bugungacha 6 nafar xodim koronavirusga chalingan. Bu haqda qo‘mita matbuot xizmati ma’lum qildi.
Xabarda aytilishicha, “Davyergeodezkadastr” qo‘mitasi tizimida 10 mingdan ortiq xodimlar faoliyat olib borsa, bugungacha 6 ta xodimda koronavirus aniqlangan va karantinga olingan. Ularning 3 nafari Toshkent viloyatida, 2 nafari Xorazm viloyatida, yana biri Qashqadaryo viloyatida qayd etilgan.
Hozirda mazkur xodimlarning 2 nafari to‘liq sog‘aygan, 4 nafari shifoxonada statsionar holatda davolanish jarayonida.
“Bugun hech kim virus bizning shahrimizga, tumanimizga, mahallamizga kelmagan deb kafolat bera olmaydi. Qo‘mita jamoasi nomidan barcha yurtdoshlarimiz ogoh bo‘lib, karantin qoidalariga rioya qilgan holda o‘zingiz, oilangiz va yaqinlaringizni ehtiyot qilishingizni so‘raymiz”, — deyiladi xabarda.
Avvalroq Vazirlar Mahkamasi xodimida koronavirus aniqlangani, hukumat binosi qat’iy karantinga olingani, “Mahalla va oilani qo‘llab-quvvatlash markazi” Jizzax shahar bo‘limining bir nafar xodimida COVID-19 infeksiyasi aniqlanganligi sababli ushbu markaz va shahar hokimligi binosi karantinga olingani xabar berilgan edi.
Shuningdek, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov ham koronavirusga chalinib, sog‘aydi.
Oliy Majlis Qonunchilik palatasi deputati Madina Baratova uch kundan buyon koronavirusga topshirgan testi javobini ololmayotganini, Adliya vaziri maslahatchisi, bloger Shahnoza Soatova koronavirusga oilaviy chalingani va COVID-19’ga test topshira olmayotganini bildirgan.
Izoh (0)