Koronavirus pandemiyasi vaqtida Aberdin universitetining 20 yoshli talabasi Kleon Papadimitriu Shotlandiyada qolib ketgan. U o‘zining Afinadagi uyiga qaytishni istagan, biroq barcha reyslar bekor qilingan. Kutilmagan vaziyat Kleonni to‘xtatib qolmagan va u o‘z oilasining bag‘riga velosipedda qaytishga qaror qilgan, deb xabar beradi CNN.
“Hozirgina bu naqadar ulkan natija ekanligini anglab yetdim. Men o‘zim haqimda, ichki imkoniyatlarim, kuchli va kuchsiz tomonlarim haqida ko‘p narsalarni bilib oldim. Ushbu safar hech bo‘lmaganda yana bir kishini o‘zining qulay zonasidan chiqishga va keng ko‘lamli biror yangilikni sinab ko‘rishga undashiga umid qilaman”, — deydi Kleon.
Papadimitriu universitetning ikkinchi bosqichini tamomlamoqda. Epidemiya boshlangach, talabaning ko‘plab do‘stlari uyiga qaytgan, u esa darslarni o‘tkazib yubormaslik maqsadida Shotlandiyada qolgan. Yigit vataniga qaytadigan uchta reysga ro‘yxatdan o‘tishga uringan, biroq ularning barchasi bekor qilingan.
“1-aprelga kelib Aberdinda karantinga kamida bir oy qolib ketishimni bilardim”, — deydi u. Shunda Kleon velosipedda sayohatga chiqishga qaror qilgan.
Avvaliga Kleon o‘z g‘oyasini “uddalab bo‘lmas orzu” deb baholagan, biroq oxir-oqibat barcha zarur narsalarni (velosiped, uxlash uchun mo‘ljallangan to‘shak, palatka va hokazo) xarid qilgan va o‘z rejasini oilasiga aytgan.
Talaba 10-may kuni yo‘lga chiqqan. Uning so‘zlariga ko‘ra, u har kuni 55-120 kilometr oralig‘ida yo‘l bosgan. Dastlab u Niderlandiyaga, bir necha kundan so‘ng Germaniyaga, Avstriyaga va Italiyaning sharqiy qirg‘oqlariga qadar yetib borgan. Gretsiyaning Patri portida u qayiqqa o‘tirib, Afinaga qadar suzib borgan.
Kleon o‘zining palatkasini o‘rmon va keng dalalarga qurgan. Bundan tashqari, Yevropaning turli mamlakatlarida do‘stlari bilan aloqada bo‘lib turgan, ular esa Kleonga boshpana va yuvinib olishi uchun sharoit yaratib bergan.
Talaba 27-iyun kuni uyiga kirib kelganida uni oilasi, ko‘plab do‘stlari hamda uning sayohatini ijtimoiy tarmoqlar orqali kuzatib borgan mutlaqo notanish insonlar kutib olgan.
Izoh (0)