Коронавирус пандемияси вақтида Абердин университетининг 20 ёшли талабаси Клеон Пападимитриу Шотландияда қолиб кетган. У ўзининг Афинадаги уйига қайтишни истаган, бироқ барча рейслар бекор қилинган. Кутилмаган вазият Клеонни тўхтатиб қолмаган ва у ўз оиласининг бағрига велосипедда қайтишга қарор қилган, деб хабар беради CNN.
«Ҳозиргина бу нақадар улкан натижа эканлигини англаб етдим. Мен ўзим ҳақимда, ички имкониятларим, кучли ва кучсиз томонларим ҳақида кўп нарсаларни билиб олдим. Ушбу сафар ҳеч бўлмаганда яна бир кишини ўзининг қулай зонасидан чиқишга ва кенг кўламли бирор янгиликни синаб кўришга ундашига умид қиламан», — дейди Клеон.
Пападимитриу университетнинг иккинчи босқичини тамомламоқда. Эпидемия бошлангач, талабанинг кўплаб дўстлари уйига қайтган, у эса дарсларни ўтказиб юбормаслик мақсадида Шотландияда қолган. Йигит ватанига қайтадиган учта рейсга рўйхатдан ўтишга уринган, бироқ уларнинг барчаси бекор қилинган.
«1 апрелга келиб Абердинда карантинга камида бир ой қолиб кетишимни билардим», — дейди у. Шунда Клеон велосипедда саёҳатга чиқишга қарор қилган.
Аввалига Клеон ўз ғоясини «уддалаб бўлмас орзу» деб баҳолаган, бироқ охир-оқибат барча зарур нарсаларни (велосипед, ухлаш учун мўлжалланган тўшак, палатка ва ҳоказо) харид қилган ва ўз режасини оиласига айтган.
Талаба 10 май куни йўлга чиққан. Унинг сўзларига кўра, у ҳар куни 55-120 километр оралиғида йўл босган. Дастлаб у Нидерландияга, бир неча кундан сўнг Германияга, Австрияга ва Италиянинг шарқий қирғоқларига қадар етиб борган. Грециянинг Патри портида у қайиққа ўтириб, Афинага қадар сузиб борган.
Клеон ўзининг палаткасини ўрмон ва кенг далаларга қурган. Бундан ташқари, Европанинг турли мамлакатларида дўстлари билан алоқада бўлиб турган, улар эса Клеонга бошпана ва ювиниб олиши учун шароит яратиб берган.
Талаба 27 июнь куни уйига кириб келганида уни оиласи, кўплаб дўстлари ҳамда унинг саёҳатини ижтимоий тармоқлар орқали кузатиб борган мутлақо нотаниш инсонлар кутиб олган.
Изоҳ (0)